Midd Schwung in de Bään

Manchmool kumme joo gudde alde Gefloochenheide widder zu Ehre, wo mer gedenkt hädd, die wääre schunn längschd ausgestorb. Die Musiggschuul hadd glaab ich demidd aangefang. Dann hadd e Lokaal in Haasel so ebbes im Programm gehadd. Unn jedds duud aach es Berschmannsheim in Dengmerd dem geneischde Publikum äämool im Moonaad e Tanztee aanbiede

Manchmool kumme joo gudde alde Gefloochenheide widder zu Ehre, wo mer gedenkt hädd, die wääre schunn längschd ausgestorb. Die Musiggschuul hadd glaab ich demidd aangefang. Dann hadd e Lokaal in Haasel so ebbes im Programm gehadd. Unn jedds duud aach es Berschmannsheim in Dengmerd dem geneischde Publikum äämool im Moonaad e Tanztee aanbiede. Wobei die Betoonung nidd unbedingt uffem Tee leid, weil sicher aach das ään odder anner Pikkolööche uffegemacht werrd. Unn die Musigg kummd nidd vum Band sondern vun der Bänd, als frisch gezupft. Fier de Tanztee am Sunndaach doo sinn joo friejer die junge Leid weit gelaaf. Das war sosesaan de konkreede Vorleifer vum Tschätt-Room. Was sovill hääscht wie Etablissemang zum Quatsche unn Traaatsche. Unn fier sich kenneseleere, awwer praggdischerweis glei in Natura. Weil mer sich beim Danze joo zwangsleifisch menschlich nääjer kummt. Die beschde Kaarde hann in soome Fall nadierlich die, wo gudd danze kinne. Doodefier gebbds dann awwer die Danzschuule. Woo sich einische ganz scheen änner abgekwäält hann. Wie mei Freind Schorsch, der wo midd mir dort danze geleert hadd. Der hadd sei Manko in der technisch Ausfiehrung wolle wettmache durch de kinschdlerische Ausdrugg. Unn hadd desweeje immer ganz romandisch die Aue verdrääd. Awwer richdisch danze iss joo aach garnidd so äänfach. Unn wann änner devunn schwäddsd, dasser es Danzbään schwinge duud, doo iss joo doodemidd noch iwwerhaupt nix gewunn, Weil midd äänem Bään allään kammer uff dem Parkedd noch nix verhexe. Das Problem besteht joo graad doodrinn, dass mer se alle zwää gleichzeidisch beniddse muss. Ohne dass mer sich e Knoode ninmacht odder innere Verleddsunge zuzieht.

Meistgelesen
Neueste Artikel
Zum Thema
Aus dem Ressort