De Aanfang vum Johr iss joo jeed Johr widder so e komischer Zustand. Mer hadd es Gefiehl, die Leid wääre all noch nidd richdisch in dem neije Abschnidd aankumm, odder? Unn mir hänge all noch soosesaan in rer Waardeschleife. Unn frooje uns ganz ängschdlich, ob das wasse uns vollmundisch aankinnische, aach alles passiert. Mer deckt sich vorsorchlich midd Not-Razioone inn, vun weeje dem Schneechaos. In Dengmerd waarde die Leid jeed Johr im Januar schweisgebaad uff die Johres-Abrechnung vun der Heizung. Unn doodruff, dass die sich im Stadtrat endlich mool sesammeraufe. Unser neijer Gesundheitsminischder iss die Waarderei langsam lääd unn will sich jedds geeje die schweinsisch Gribb impfe losse. Als Vorbild, saad er, weil es gemeine Volk nidd so richdisch zieht unn sich saad: doo waarde mer liewer erschd mool ab. An Faasenacht soll se joo jedds endlich kumme. Das, uff was mer waard, spielt sich nämlich meischdens in der Zukunft ab. Awwer weil doo noch känner war, doo iss abwaarde die Mudder vun der Porzellaankischd. Es gebbd nadierlich aach so Berufsheggdigger, denne geht das nidd fix genuch. Doo heischds dann direggd: Uff was wardschde dann noch! Das sinn die selwe, woo in de Waardeschlange vun hinne drängele unn emm in die Kniekehle fahre. Odder im Stau uff die Stoosstang. Am beschde bleibt mer doo ganz kuul unn ruft nur noo hinne. Du werrschds doch noch abwaarde kinne! Manchmool isses Waarde awwer aach ebbes Positiefes, wammer sich zum Beispiel uff ebbes Scheeenes freid, wo mer garnidd erwaarde kann. Mir perseenlich passiert das immer widder. Dass die Leid zu mir saan, - unn mer sieht denne so richdisch die Begeischderung aan: Ei, uff dich hammir graad noch gewaard!