Die Zeit zwische Weihnachte unnem neije Johr, wo mer eejer e Gang seriggschalde duud, iss komischerweis aach gleichzeidisch die Zeid, wo in manche Leid de Taadedrang unn die Unnernehmungsluschd erwacht. Also zuminneschdens gedanklich unn potenziell. Weil mer zum Johresausklang joo gääre Bilanz zieht, werrd emm nämlich schmerzhaft bewusst, was so alles im Lauf vun der Zeit unerleedischd leijegeblieb iss. Unn doo nemmt mer sich dann heffdisch unn endgildisch vor, fier das alles im neije Johr awwer garandiert se erleedische. Wanns drause nidd so kalt wär, werrde einiche sogar schunn mool die Ärmel hochkrempele. Awwer de gudde Vorsadds hadd in de meischde Fäll e Nachsadds unn der heischd: Es hadd leider nidd ganz hingehau. Unn mer waard jedds halt uff e Geleeschenhääd, wo noch ginschdischer iss. Am beschde e Johr, wo de erschde Januar uff e Mondaach fallt. Mei Freind Schorsch, der halt joo vunn so Vorsädds sowieso nidd vill. Vor Gericht wär das joo sogar e Grund zur Stroofverschärfung, wann änner ebbes vorsätzlich macht. Na, du muschd das joo wisse, hann ich ihm nur gesaad. Unn sinnischerweis hannse ihm noch zu Weihnachde e Buch geschenkt: 50 Triggs, wie mer die Welt redde kann unn doodebei noch Geld spart. Doo hadd der sich allerdings schwäär gewunnert, wie er zu der Ehre kummt. Dass ausgerechend er jedds denne Speziaalufftraach uffs Au gedriggt kried. Unn ob er vielleicht perseenlich draan schuld wär, das die Welt momentaan e bissje nääwe der Kabb iss. Doo wissd er awwer e ganzi Reih vun ganz annere Kandidaade. Unn doo leid genau das Probleem. Mer zeid gääre middem Finger uff sei Nääwemann. Awwer vielleicht hadd ders joo aach gudd vorgehadd, wer wääs?