Die einheimische Närrinne unn Narrhalleese duun jedds widder die Faasenacht zum Taach mache. So Begriffe wie Fedder Dunnerschdaach odder Speggball deute joo schunn zart aan, dass mer doo kondizioonsmääsisch e gehaldvolli Unnerlaach braucht, wammer das Ganze durchstehn will. Ab heid kammer midd der simboolträschtische operatiefe Entfernung vum Krawaddezwang joo mool de alde Adam ableeje. Odder die ald Eva, je noodemm. Wo es Vermummungsverboot bis Aschermittwoch uffgehoob iss, werre dann bei der Koschdümierung die versteggelde innere Werte aach mool demonschdratief noo ausse gekehrt.Das iss wahrscheins aach de tiefere Sinn des Verboozens: das doodebei de heimliche Freibeuter im Mann odder die Madamm Pommpadour in der Fraa zum Vorschein kummt. In soome klassische Autfitt sieht mer joo meischt aach werklich scheener aus wie normal, unn wanns nur desweeje iss, weil die dolle Accessoires vun de ästhetische Schwachstelle gnäädisch ablenke. Wammer in so e Klufft eninngestie iss, doo werrd dann aach es Selbschdbewusstsein uffgemeewelt. Doo werre die sunschd ganz friedliche Narre, wo nidd im Traum draan denke werde fier iwwer die Sträng se schlaan, uff äämool muutisch unn duun sogar die Ratheiser stürme. Wo dann die Obrischkääd vor dem geballte Frohsinn die Waffe streckt unn die Schlissel rausrigge duud.

Es gebbd awwer nadierlich aach Leid, wo mer midd dem ganze Faasenachtstruuwel nidd kumme derf. Unn die wo vunn Luftschlange, Konfeddi unn Narhallamarsch Zustänn unn Pickel krien. Aach uff die Gefahr hin, dasses heischt, sie wirde kää Spass verstehn, nutze die es allgemeine Durjenanner unn mache de Doggder Kimbel unn sich selwer heimlich ausem Staub.