Iwwermorje iss joo widder e Feierdaach. Was die Erwerbstäädische noch meh eschdamiere werde, wann er midde in die Wuch falle dääd. Awwer es gebbd joo im Lauf vum Johr nidd bloos die offizielle Feierdaache. Reeschelmääsisch werre mir joo aach erinnert an alle meeschliche Gedenkdaache. Wo mehr odder weenischer hisdoorische Ereichnisse sich zum sounnsovillde Mool jähre, wie mer saad. Sogar wann se zwäädausend Johr her sinn, wie zum Beispiel die Varus-Schlacht. Odder Jubilääje, wo an beriehmde Perseenlichkääde aus de leddschde Johrhunnerde erinnerd werrd, weil an dem Datum ihr Geburts- odder ihr Doodesdaach iss. Awwer es inderessandeschde sinn joo die sogenennde Akzioonsdaache, wo mer widder unnerscheide muss, ob mer fier odder geeje ebbes aktief werre soll. So gebbds im März e Akzioonsdaach geeje Staudämm unn im Juni e Bäregedenkdaach. Wo an denne Bruno erinnert werrd, wo vor e paar Johr ins Gras hadd misse beise. Iwwerhaupt gebbds im Kalenner ball kää Daach wo nidd zu irjendebbes uffgeruf werrd. Unn es meischde kammer joo nur unnerstiddse unn notfalls aach unnerschreiwe. Oder hädde sie ebbes geeje Gedenkdaache fier Toleranz, Volksgesundhääd odder gesundi Ernährung innsewenne. In dem Bereich gebbds iwwerhaupt fier jeder Geschmagg e Aangebodd: de Wasserdaach, de Daach fier deitsches Bier unn sogar fiers Budderbrot. Wie ich mir die seitelang Lischd angeguggd hann, hann ich noch fier mich gedenkt: wie sinnisch, dasses aach e Weltlachdaach gebbd. Iwwerhaupt hann ich denne Ardiggel faschd midd links kinne schreiwe, weil die Sammlung schunn vun allään so komisch war. Ach iwwrischens heid iss de internationale Linkshänderdaach.