Im Stehn odder im Hugge?

Mer lernt doch als immer widder noch ebbes dezu

Mer lernt doch als immer widder noch ebbes dezu. Unn in rer Zeit wo ziemlich intensief iwwer die Steiere dischbediert werrd, doo isses doch interessant fier mool se erfahre, was e deitsches Gericht finanztechnisch in Bezuuch uff e Worschtbuud neilich entschied hadd: Wammer nämlich sei Rooschd- odder Körrie-Werschdcher amme Stehdisch verdrigge duud, - jurisdisch nennt mer das e behelfsmääsische Verzehrvorrichdung - doo braucht mer nur de ermääsischde Mehrwehrsteiersatz se bezahle. Das hääschd im Klartext, die Worscht iss im Siddse mehr wert, odder annerschd gesaad: Sitzflääsch, also Flääsch im Siddse iss deirer. Wie das dann bei de Gedränke iss, wääs ich nidd, awwer doo heerd mer joo meischd denne Spruch: uff äänem Bään kammer nidd stehn. Awwer dass mer jedds nur weeje der Steier sich die Bään in de Bauch stehn solld, das wär joo aach suboptimal. Weil dann joo die ganz Gemietlichkääd flööde gehn werrd, wie mer bei so steife Stehempfäng scheen siehn kann. Unn in de Männäddscher-Seminare krien se heid joo schunn beigebrung, dasse ihr endlos langweilische Meetings am beschde im Stehn abhalle. Weil das schunn so e unnerschwellischi Ufforderung wär, sie sollde nidd so lang mache. Awwer bei uns hie im Saarland, wo joo als schwäär gaschtfreindlich bekannt iss, unn wo mer sich generell immer freit, wann jemand zum Maije kummt, doo iss das ganz annerschd. Doo heischt nidd umsunscht de Willkommensgruus: Ei huggen eich! Unn wannse dann all so luschdisch beienanner hugge, doo kanns schunn mool passiere, dasse am Schluss all ääner hugge hann. Unn am näägsche Morje middme digge Kobb stöhne: Ich wollt ich wär e Debbisch, doo kinnd ich de ganze Daach leije bleiwe.

Meistgelesen
Neueste Artikel
Zum Thema
Aus dem Ressort