Was ich unheimlich inderessand finne, sinn die klääne Artiggele hie in der Zeidung, wo se de Zugezoone die Dengmerder Lääwensart vergliggere. Doo kammer sogar als Einheimischer noch ebbes leere unn sich Aanrechunge holle. Weil mer joo meischd das, was direggd vor der Hausdier leid, leider nidd so richdisch eschdamiere duud. Unn erschd wann das bei de Auswärdische gudd aankummt, doo saan dann aach uff dem Umwää die Inngeborene widder: Ei gugge mool doo, ich hann garnidd gewissd, dass mirs hie bei uns so scheen hann. So hann zum Beispiel jedds die Bilder vun unserm beriehmde Weisgerber in Schweinfurt bei rer Ausstellung Furore gemacht. Vielleicht bringt das hinnerher de ään odder anner dezu, dasser sich denne Kunschdgenuss aach mool gönnt, wann die Bilder hie widder e Dach iwwerm Kobb hann. Manchmool reichds joo werbetechnisch schunn, wammer ebbes Vertraudes, wo emm banal unn alltächlisch vorkummt, e bissje sprachlich uffbrezzele duud. Unser hundsgewehnliches Sauerkaut zum Beispiel gebbds jedds se kaafe in ganz eedle Doose, wo White Cabbage druffsteht. Was sovill hääschd wie Weißkohl. Doo iss das Gemies awwer ganz scheen die Trebb enuff gefall, hann ich mir gedenkt wie ich das gesiehn hann. Noch friejer hann se doodezu äänfach Kabbes gesaad. Unn der hadd schunn der Witwe Bolte am beschde geschmaggd, wann er widder uffgewärmt war. Manchmool awwer driggd sich ääner so hochgestoche aus, dass mers ball nidd versteht: Es Volume vun der Bona terrestris iss reziproproportional zu der intellektuelle Kabbazidääd vumme prakdizierende Ökonom. Awwer so heerd sichs doch wesentlich besser aan wie wammer saad: Die dimmschde Baure hann die diggschde Grummbeere.