Ich will joo nimmand die Azwenzzeit vermiese, awwer wammer sich die allgemeine Laache so aanguggd unn die Meldunge, die wo jedds drebbchesweis durchsiggere, doo kammer schunn vor Weihnachde aus vollem Herze saan: awweile hammer die Bescheerung. Unn mer iss joo hin unn hergeriss, wie mer sich verhalle soll: ob mer liewer ebbes seriggleeje soll fier die harde Zeide, woose uns schunn aangedroht hann. Awwer wemm kammer dann iwwerhaupt noch traue, ich menn finanztechnisch gesiehn. Bevor ich mei sauer Verdiendes leichtsinnisch aanleeje, woos dann doch vum Dax gebiss werrd, doo hau ich doch mei Weihnachtsgeld liewer selwer uff de Kobb. Unn ich dääd joo doodemidd aach gesamteekonoomisch sogar noch e guddes Werk. Weil irjendwoo muss das ville Geld joo widder herkumme, woose doo in de Sand geseddsd hann. Wammer die Zahle lääst, doo will mers als miggrischer Kläänsparer ball gar nidd glaawe. Unn de Fachmann schwäddsd joo nidd umsunschd in dem Sesammehang gääre vunn schwindelerreeschende Summe. Awwer bevor mir in unserm Unverstand jedds glei widder aanfange se moddse unn se joomere, doo missde mir seerschd mool an die denge, wo die doo Kriese richdisch hart treffd. Wie ich die Iwwerschriffd am Samschdaach gelääs hann, doo hann ich doch misse schwäär schlugge: Die Geliebte als Krisenopfer. Doo hann die Muldimüllionääre sich geäuserd, dass se jedds bei ihre Määdresse an de Klunker spaare missde. Unn das ausgerechent korz vor Weihnachde. Denne Ardiggel hann ich mir gudd uffgehoob. Fier denne Fall, dass an Weihnachde in der Familie jemand es Gesicht verziehd, wanns Geschenk diesmool e Nummer klääner ausfalld. Doo kinne die mool siehn wies iss, wammer richdische Probleme hadd.