Ich hammir graad die nei Wannerkaard vum Bliesgau besorcht unn schunn e paar dolle Aanreechunge geholl fier Ooschdertuure. Unn doo kann eichendlich orientierungsmääsisch nidd vill passiere. Wies in dem alde Spruch schunn heischt: Pfadfinder finne eischentlisch immer e Pfad.Awwer wammer middem Audo unnerwääs iss, doo iss mer uff fremdi Hilf vill meh aangewies. Doo sinn dann allerdings Landkaarde heidsedaachs schunn e bissje aus der Mode. Weils joo jedds faschd unner jedem Blechdach so e Nawwigazioonsgerät gebbd. Awwer so e dolli moderni Technigg macht manchmool aach als Zigge. Dann steht mer doo unn guggd dumm unn heert wie ääs uffem Beifahrersidds saad: Na, wie gehts jedds weider? Desweeje heischt das Gerät aach abgekirzt Nawie.

De greeschde Spezialischt in der Beziejung iss joo mei Freind Schorsch. So wie der sich als im Gelände verfranse duud, kinnd mer menne, er hädd sei Ausbildung als Verfahrenstechnigger gemacht. E goldischi Geschicht iwwer e tiefsinnischer Gedankeaustausch zwische me Kraftfahrer unn seiner Orientierungshilf hann ich neilisch gelääs. Doo hadd e Paschdor sich so e Ding midd Sproochfunkzioon aangeschafft unn wollt mool teschte, wie das so reagiert. Unn hadd als Bestimmungsort ingebb: Friede auf Erden. Prompt hadder zur Antwort kried: Ihr Ziel liegt auf einer nicht befahrbaren Straße.