Hadd mer so ebbes schunn emòò geheerd: Dò wolld ääner beim Gerischd feschdschdelle lasse, dass es hochdeidsche Word "Dummschwätzer" e Beleidischunng wäär unn dass mer so ebbes dsu ääm nidd saan derf. Was soll mer danne dò noch saan? Uffs Gerischd laafe, dass mer äänem die Schniss verbied! Dò fähle mier die Worde! Isch menn, es ruddschd ääm doch mò das ään odder anner Word so raus unn danne isses gesaad unn mer kanns jò aach schwäär seriggholle. Veleischd saad mer "Tschuldigung" unn mennd danne hinnerum, dasses doch gaanidd falsch waar, wies rauskumm iss. Dò wääs der anner doch weenischdens, woorer draan iss! De beschd gääd mer jò uff Bladd schille, weil Hochdeidsch känne die Leid alsemò nur schwäär verschdehn. Se sinn danne gleisch beleidischd, ärjere sisch gabudd unn laafe uffs Gerischd. Unn alles fier niggs unn widder niggs! Fier was schwäddse die Leid nidd so, wie ne de Schnawwel gewaggs iss? Wann ääner e rischdischer Dummschwäddser iss, muss mer das jò nidd uff Hochdeidsch saan. Am Enn isser noch gräädsisch unn drähd dursch. Mer kann doch gans äänfach uff Bladd "Fòòdser" dsuu demm saan unn kä ääner reeschd sisch driwwer uff. Jeeder wääs awwer aach, wies gemennd iss! De beschd saad mers gans deidlisch, veleischd mid "Dummfòòdser", dasser aach genau wääs, wies gemennd iss! Wann mer dsuu äänem Dummniggel, Fòòdsbagge, Dummbraddler odder Diggschniss saad, danne iss das eischendlisch kä Beleidischunng. E bissje schdärger iss ehrer schunn Dolldabbes, Draanfunsel, Dreggaarsch, Dreggwudds, Dreggschniss, Dreggskerl odder Dreggsau. Aach wann mer dsuu äänem Haawebraddler, Gwasselschdribb,Räddschbaas unn was wääs isch noch saad, danne wääs isch nidd, ob e Gerischd, wo se jò allgebodd nur Hochdeidsch schwäddse, iwwerhaubd verschdehd, was dòòdemid gemennd iss. Iss dass wirglisch e Beleidischung? So schwäddse mier doch jeeder Daach! Mer kännd segaar saan: So Wärder sinn e bissje ebbes, was de annere eschdammierd. Kann also gudd meeschlisch sinn, dass de Rischder gaanidd wääs, was so Ausdrigg bedeide wie Bruljemacher, Galjeschdrigg, Baubser, Wibbschesmacher, Kladdschbaas, Dorfschell, Räddschweib, Schdrunser, Schnadderliesje, Schnerr, Jammerlabbe, Grammeddschler, Dorfbääsem, Gwaddschkobb, Gwassler, Gweerdreiwer, Haardsgräämer, Massigg, Schluuri odder Doofkobb. Dò iss doch alles glaar, was mer vun ääm halld, ohne dass mer ne noch uff Hochdeidsch groos beleidische muss! Wann ääner danne de Beleidischde schbilld, nur weilem ääns vun denne Wärder nidd passd, danne iss eh jeed Word fier denne dse schaad. Gugg ne de beschd gaanidd aan! Das iss die greeschd Schdròòf, die wo mer fier ääner finne kann. Lass ne linggs leie unn saa gaaniggs dsem. Dò wird däär Aue mache unn iss jeddse mò rischdisch beleidischd!