Ab unn zu unn ganz zart kammer joo schunn mool e leisi Friehlingsahnung krien, wann de Wedderfrosch in denne Daache die Lääder e paar Sprosse hochgehubbst iss. Die ganz Ungeduldische hogge midd ihrem Kapputschieno schunn drause vor de Lokalitääde unn halle ihr Bleichgesichter in die Sunn. Apropo hogge - unner all denne einheimische Produggde aus der Biosfääre gebbds jedds aach e ganz neijes Markezeiche: de Bliesgau-Hogger. Die kompaggde unn originelle Sitzgeleeschenhääd iss, im Geejesadds zu ihrem Geejestigg, dem gemeine Stuwwe-Hogger eejer e Freiluffdgewächs.Unn es Maderiaal is aus äänfachem Naduurholz vun einheimische Bääm, wo im Gau uff denne scheene Steuobstwiese waggse. Unn de Widds bei der Sach iss, dass, wammer sich so e Hogger zuleed, direggd nochmool so e Bäämche ingeplanzt werrd, damidd uns de Rohstoff die näägschd Zeit nidd ausgeht. Jedds saan Sie vielleicht, so e simples Sitzmeewel reist emm doch werklich nidd vum Hogger. Awwer das solls joo aach garnidd. Das klingt nämlich meh noo Äkktschen, Uffreeschung unn Heggtigg. Uff soome Hogger soll mer joo eejer e bissje länger hogge bleiwe unn die Bligg ganz entspannt schweife losse iwwer die malerisch Landschaffd. Dass mer mool widder zum Durchatme kummt.

Ganz logger uffem Hogger eewe. Wahrscheins iss genau bei soorer Geleeschenhääd em Rudolf Schwarz, dem Kunscht-Schäfer, die Idee zu dem Hogger kumm. Es gebbd awwer noch jemand in unserer Reeschioon, wo einheimische Helzer fier sei naduurnaahi Bauweise bevorzuuche duud. Seid neijeschdem hadd sich nämlich de Biewer widder hie niddergeloss. Unn das war joo aach Zeit, weil se midd dem puddsische Naachetier schunn tuurisdisch Reklame gemacht hann.