Na, wie weit sinn Sie dann middem Friejohrsbudds? Iss rundrum schunn alles schunn geberscht unn gestrählt, wie mer so plasdisch saad. Unn die Fenschdere gewienert, fier denne Fall dass jedds doch langsam die Sunn eninnscheint. Unn dasses em nidd so geht wie meinem Freind Schorsch, wie der midd seinem Nochbar Zoff gehadd hadd. Doo hadd der ihm an de Kobb geworf, er hääd de Plan vun ihm im Sagg. Unn sei Absichde wäre wie sei Fenschderscheiwe. Schwäär dreggisch, awwer doch noch durchsichdisch. Im Zuuche vun der Gesundhäädswell, wo uff gudd Neideitsch Wellness hääschd, werrd die Grundreinischung joo aach gääre uff die eichene Innereie ausgedehnt. So ebbes hääschd dann Entschlaggungskuur, weil mer doodezu ziemlich vill Kohle braucht. Offiziell iss joo jedds die Fastezeid erumm. Trotzdem isses joo verninfdisch, wammer desweeje nidd glei widder kaloriemääsisch zuschlaad, wann de Winderschbegg halbwegs widder runner iss. Das krien jedds an de Dengmerder Schule sogar schunn die Kinner beigebrung. Doo kumme die in de Genuss vunn rer spezielle Verzehrserziehung unn leere, dass die Gelleriewe unn Erbse nidd in Dose uff die Welt kumme. Unn dass die Milch vun de Kieh, wo nur in de seldenschde Fäll lila sinn, nidd geschnidd produziert werrd. Doodezu passt die Meldung, dasse jedds erausgefunn hann, dass Pommfritts sichdisch mache. Unn desweeje eichendlich zu de Dopingmiddel geheere. Mer will ne joo nidd alles verbiede, awwer es iss doch an der Zeit, dass unser Kinner widder uff de Geschmagg kumme. Unn mit soome Ernährungsfiehrerschein merke, dass mer fier Esse wo schmaggd nidd unbedingt gudd verschdeggelde Verstärker braucht.