Aach wann e äänzischi Amschel noch kää Summer machd, merkt mer doch so langsam, dass uns demnäägschd es Friejohr blieht. Unn all sinn sich äänisch: Es werrd awwer aach langsam Zeid, noo dem doo Winder midd seiner globaale Verkäldung. Sogar Leid wie mei Freind Schorsch, wo sunschd vun nix Ahnung hann, hann jedds zuminnischdens e dumpfi, dass doo ebbes in der Naduur im Gang iss. Unn weil es Friejohr sich bei Mensche iwwer die Gefiehle bemerkbar macht, reiwe die sich jedds aach die Aue unn kumme hormonell langsam uff Trabb. Die ganz Abgehärdede hugge sich schunn mool drause hin uff die Ausebestuhlung, aach wanns doo de Kaffee nur in Kännjer gebbd. Außerdem werre im März bekanntlich die Rösser aangespannt. Unn kaum duun die erschde Sunneschdraale de Asfalld uffwärme, doo kumme aach die Päärdestärke unner der Modoorhaub widder verstärkt zum Insadds. Unn ab geht's ins Griene uff zwää bis vier Räder. Weil aach alles was Bään hadd, in die Naduur drängt, werrds sogar im Wald langsam eng. Doo stehn nämlich manchmool Schilder: Vorsicht Baumfällungen! Unn die Päädcher sinn vum leddschde Rään noch aarisch matschisch.Es Wedder macht awwer aach Zigge: mool so unn mool so. Morjens saukalt unn middachs werrd mer am liebschde die Klamodde all auszieje weil mer so schwiddse duud. De Wedderbericht iss aach kää groosi Hilf. Sie duun emm masseweis Johrhunnertprognose aanbiede, awwer ob ich mich am Wucheenn nomool warm aanzieje missd, doo tabbe se noch e bissje im Dungele. Unn weil das midd de Klääder so e unsicheri Sach iss bei dem Iwwergang vum Winderschloof in die Friejohrmiedischkääd, doodefier gebbds dann e Spezialaanferdischung: de beriehmde Iwwergangsmandel.