Es griend so grien wenn Blieten bliejen
Geht ihne aach so es Herz uff, wannse zur Zeit drause um sich gugge. Faschd kinnd mer singe: Es grient so grien. So wie awweile iwwerall die Bliede blieje - unn das nidd nur in Spaanje. In sämtliche Vorgäärde, uff der Verandas unn notfalls uff de Finschderbänk duud die Botaanigg sich uffbretzele, dass es nur so e Pracht iss
Geht ihne aach so es Herz uff, wannse zur Zeit drause um sich gugge. Faschd kinnd mer singe: Es grient so grien. So wie awweile iwwerall die Bliede blieje - unn das nidd nur in Spaanje.In sämtliche Vorgäärde, uff der Verandas unn notfalls uff de Finschderbänk duud die Botaanigg sich uffbretzele, dass es nur so e Pracht iss. Ei, gehnse nur mool in Dengmerd iwwer unser bunder Wochemarkt, doo erlääwe sie ihr roodes, grienes unn gääles Wunner. Doo sieht mer mool scheen, dass die Naduur joo eichendlich uff Iwwerfluss ingestellt iss. Die bloost nämlich trotz Feinstaubverordnung üppisch de Bliedestaub durch die Luffd. Das iss allerdings fier einische Zeitgenosse garnidd so erfreilich. Desweeje schwäddse die arme Mensche, denne wo desweeje die Naas laafd, aach vum Pollefluch.
E ganz annerer Bliedezauber, nämlich e fauler, der duud sich leider aach bei uns widder breit mache, wammer de Berichde glaawe derf. Es iss nämlich verstärkt noogemachdes Geld im Umlaaf, vor allem die falsche Fuffzischer. Unn weil sich die Kopier- unn Druggtechnigg aach immer weiderentwiggelt, siehn die faschd wie echt aus. Awwer wammer so änner unnergejuuwelt kried, doo is mer de Gelaggmeierde. Weil joo laut Stroofprozessordnung nidd nur dem, wo denne Schwindel produziert, sondern aach dem, wo so Falschgeld weiderverbreite duud, nix Guddes blieht.
Awwer mer brauch sich garnidd doodriwwer se wunnere, dass das ganze sich zu soome Problem entwiggelt hadd. Mer hädd die Entwigglung joo gudd kinne voraussiehn. Wo se sogar amtlich bestäädischd hann, dass die Scheine fälschungssicher wääre. Was joo fier de gesunde Menschverstand nur hääsche kann, das se sicher gefälscht werre.
