E ganzi Stunn geschenkt
Es heischt joo umgangssprachlich oft, mer kried im Lääwe nix geschenkt. Awwer das iss joo vill se pessimissdisch gedenkt. De leddschde Sunndaach hammir sogar e ganzi Stunn geschenkt kried, ganz steierfrei unn ohne Abziech. Unn Zeit iss iwwerhaupt es wertvollschde, was mer verschenke kann. Weil mer joo aach als saad: Zeit iss Geld
Es heischt joo umgangssprachlich oft, mer kried im Lääwe nix geschenkt. Awwer das iss joo vill se pessimissdisch gedenkt. De leddschde Sunndaach hammir sogar e ganzi Stunn geschenkt kried, ganz steierfrei unn ohne Abziech. Unn Zeit iss iwwerhaupt es wertvollschde, was mer verschenke kann.Weil mer joo aach als saad: Zeit iss Geld. Awwer der Spruch iss wahrscheins vumm Mammon perseenlich gesponsert. Mer kann sich nämlich leddschen Endes fier all Geld vunn der Welt kää Zeit kaafe. Unn sowieso iss Zeid joo schwäär relatief: wammer nämlich mool widder im Stau steht odder wammer Zahnweh hadd odder noch besser: wammer Zahnweh hadd die ganz Zeit wo mer im Stau steht, das kummt emm ziemlich lang vor. Sitzt mer awwer in feicht-frehlicher Runde in nedder Gesellschaft sesamme, doo schnerre die Stunne nur so an emm vorbei. Unn im Hinnergrund erklingt das Lied: Wer hadd an der Uhr gedreht?
Am langsamschde vergeht die Zeit joo, wann rein gar nix passiert. Nidd umsunschd schwäddsd mer doo vunn langer Weile. Awwer das iss ebbes, was unser heggdischi Zeit iwwerhaupt nidd verdraad. Doo werre die Leid so wiedisch, dasse vor lauder Raasch die Zeit doodschlaan.
Awwer ich wollt joo eichendlich vum Schenke schwäddse, doo hädd ich nämlich e prima Tipp. Am Wocheenn iss joo in der Stadthall widder die Ausstellung Edle Steine. Unn fier denne Zwegg, zum Verschenke, doo mache sich so edle Stään immer gudd. Klääne Schmuggstigger erhalle bekanntlich die Freindschaft. Es geht eewe nix iwwer edle Spender. Mei Freind Schorsch, der hadd sich awwer geziert, wie seins ihne diesbeziechlich hadd wolle stiwwele. Bei ihm wär das im Moment schlecht, er wär nämlich graad uff Steinzeit-Diät.
