Sie hann sicher schunn devunn geheert, dass mer zur Zeit graad es Jahr des Waldes feiere. Was saan ich - sogar das Jahr der Wälder! Weils so Weggeetazioonszoone joo in verschiedener Ausfiehrung gebbd, zum Beispiel als Regenwälder odder Urwälder.In de heimische Gefillde unn speziell in Dengmerd sinn mir joo in der Hinsicht beschdens ausgestattet. Unn wahrscheins wars e Urinnwohner, wo denne Ausspruch erfunn hadd: ich glaab ich stehn im Wald. Rundrum wachse bei uns nämlich die Bääm in de Himmel unn zwar aach schunn seit Urzeite. Zum Beispiel iss die Kohle, wo se hie abgebaut hann, aus sesammegepresstem Wald vor hunnertdausende vun Johre entstann. Unn aach die Zeidung, wo jeed Wuch ihr Atzel drinn schreibt, iss im Grund nix anneres wie e besunnerschd dinn geschnibbelder Baam. Unn in dem Wald doo tummelt sich all meeschlich Viehzeich: Pikus de Waldspecht odder die Waldfee. Unn der ihr männliches Geejestigg, de Waldheini. De Waldmeischder allerdings das iss e Gewächs unn kää Titel. Weil de Owwerschde im Forschd, also sosesaan de Platzhirsch, das iss de Owwerferschder. Der wo uffpasse muss, dass uns unser scheener Wald nidd unnerm Auspuff wegsterbt. Unn dass in seinem Revier alles sei Ordnung hadd. Weil im Wald joo aach bekanntlich die Reiwer sinn.

Jedds im Friehjohr, wann de Wald de griene Ausschlaach kried, doo greift dann aach schunn mool gääre die Waldesluschd um sich. Sogar in der Oper kummt unser Wald vor, zum Beispiel im Freischütz. Durch die Wälder, durch die Aue, duun se doo singe. Unn das midd Recht, weil, dass de hochprozendische Aanbligg vunn Grienzeich gudd iss fier die Aue, das iss joo mittlerweil sogar schunn wissenschaftlich bewies.