Mer heerd jedds vun all Seide, dass der doo Winder wahrscheins noch schwäär ins Geld gehn werrd. Awwer was geht heidsedaachs nidd ins Geld? Unn wammer de Zustand vun unsre Stroose so sieht, doo ahnt mer schunn, was fier holprische Zeide uff uns zukumme. Iwwerall nix wie Lecher, wo mer nidd wääs, wo mer seerschd aanfange soll fier die all se stobbe. Lecher im Asfalt, wo notderfdisch gefliggd werre misse, Lecher im Ozean, wo nur dreggisch Brieh raus kummt unn flächedeggend die Lecher in de Haushalde. Unn im Hinnergrund spiele se de leddschde Walzer: Ein Loch ist im Eimer... Ich wääs nidd warum, awwer doo muss ich immer an e aldi Geschicht midd meinem Freind Schorsch denke. Wo der sich beschwert hadd, in seinem Schrank wäre die Modde unn in de Klääder Lecher. Ei, dann versuchs doch mool midd Moddekuchele. Das hann ich joo, awwer was glaabschdu was mer e Huddel hadd bis mer die Biesder mool treffd. In Dengmerd versuche se neijerdings midd blaue Briefe die Lecher se stobbe. Die wo Grundsteijer bezahle sinn seerschd an die Reih kumm. De Dozende an der Volkshochschul hannse jedds es Fahrgeld gestrich. Unn wann ääner mennd, doo kinnder joo glei de Leffel abgenn, doo hannse schunn e Erheejung vun de Friedhofsgebiehre in petto. Unn das iss jedds nur in dem klääne Dengmerd so. Inn heejere Reeschioone, wo die Krösusse sich tummele, doo werrd midd Zahle erummgeschmiss, wo unserääner garnidd gewissd hadd dasses so groose iwwerhaupt gebbd. Unn es kloorschde iss, dasses bei dem ganze Hin unn Hergeschiewe joo um Geld geht, wo iwwerhaupt nidd doo iss. Nidd umsuscht schwäddsd mer doo gääre vun Un-Summe. Unn ganz fix - Simsalabim - sinnse dann aach schunn widder weg.