Mundart „Du bischt ma de Allerschenscht“
Im Saarland wird bundesweit am meisten geschnarcht und gesungen, es gibt die meisten Kneipen und Vereine und den höchsten Katholiken-Anteil. Günter Hussong macht sich Gedanken über die Rekorde und ist sich sicher: Nicht alle Superlative sind ein Kompliment.
Es Saarland hat e Haufe Rekorde uffseweise; vielleicht suche ma aastännisch denoo, well ma so e kleen Ländche sinn. Deswää sellt ma nie iwwer e annerer Saarlänner läschtere – die Gefahr, dass der das schun am nächschte Daa vezehlt kried, wär zu groß. Uff de anner Seit krien ma so schnell ’s Neischte met, obwohl joo nie gerätscht werd...
Meer hucke all eng uffenanner, so hat fascht jeder enner an der Hand. Wann net, froot ma eenfach enner, wo enner kenne kennt, wo enner kennt. Awwer manchmoo nemme uns die, vun denne wo ma menne, meer hätte se an oder sogar in de Hand, nur uff de Arm.
Serick zu de Rekorde. Dass ’s Saarland ’s ältschte neie Bundesland iss, wisse fascht allegar. Vor sticker zwää Wuche hann ich aa noch gelääst, dass Saarlänner am meischte schnarche unn singe – mei Fraa behaupt, bei meer däät sich das zimmlich ehnlich anheere. Kenn Wunner, dass bei uns viel geschnarcht werd: meer beleeje joo unner de Bunneslänner de dritte Platz im Schloofe – awwer immerhin noch eener Platz hinner de Pälzer! Nerjends in ganz Deitschland isses so heiß wie bei uns; 37,9 Grad sinn vorsjohr gemesst woor. Unn trotzdem schlooft kaum jemand vun uns nackisch. Vielleicht iss das e Grund, dass bei uns die weenischte Kinner uff die Welt komme, obwohl ma de heechschte Andääl an Kaddolicke hann – ’s gebt awwer aa e ganzer Haufe Proteschtante.
Die niedrisch Geburterat kennt jetzt joo doodemet sammehänge, dass die Saarlänner beim Biertrinke unn bei de Kneipedicht vorne leie. Meer hann die meischte Vereine pro Kopp unn misse uns deswää net viel Gedanke mache om Integration. Zugezoone gehn in e Verein, nemme am Beschte noch e Peschtche an, unn die Beer iss gescheelt!
Im Saarland gebt’s de heegschte Andääl ann Eenfamilieheiser. Beim Bau werd schun seit jeher viel selbscht gebosselt. Seit die ganze Gruuwe zu sinn, isses Material halt e bissje deirer woor. Awwer komisch: Wann Männer später dann moo ausem Haus wolle, sinn Weibsleit oft ausem Heisje unn meer krien am Morje druff gefährlichere Superlative se heere:
„Deletscht warsche de Letscht, wo aus de Wärtschaft iss. Dich kann de Eerschtbescht, aa wann’s de Allerletscht iss, metteme Nääzfäädemche am Stammdisch anbinne. Unn morjens hasche dann de Schloofanzuuch hinnerscht-verrerscht an. Du bischt ma de Allerschenscht.“ Wobei ich ma net sicher bin, ob de letschte Superlativ wäärklich e Kompliment war.
