Neilisch hann ich im Schwimmbad de Dengmerder Mooler unn Dichder Manfred Kelleter getroff. Unn doo hammir nadierlich aach denne Standardspruch losgeloss, wo mer jedds iwwerall se heere kried: De Summer iss rum. Unn dann hammir uns noch wechselseidisch gewunnerd, dass mer sich jeed Johr widder nei doodriwwer wunnerd, dass uff de Summer unweigerlich als nochmool de Herbschd kummt. Wo mer doch schunn e paar Johrzehnde uffem Buggel hadd unn an denne Ablauf eichendlich gewehnt sinn missd. Doodriwwer wunnerd mer sich iwwrischens aach, vielleicht sogar noch meh. Also iwwer die ville Johrzehnde uffem Buggel. Iwwerhaupt gebbds heidsedaach joo unheimlich vill Sache, wo mer ausem Staune gar nimmeh erauskummt. Wammer zum Beispiel die Zeidung lääst. Es soll Leid genn, die hann vumm ville Kobbschiddele schunn e ganz steifer Hals. Odder e digger, jee noodemm. Wie hann se friejer als so treffend gesaad: Doo staunt de Laie unn de Fachmann wunnerd sich. Uff die Dauer soll das awwer nidd gesund sinn unn werrd aach nidd vun der Krangekass bezuschuschderd. Desweeje hall ich mich liewer an das Moddo vum Otto Reuther: Ick wunder mir über jarnicht mehr. In dem Sesammehang gebraucht mer nämlich aach oft denne Ausdrugg, dass mer sei blaues Wunner erlääwe duud. Unn doo wääre mer dann schunn widder beim Dengmerder Schwimmbad.