So e Winder, wie mer ne in dem Johr hann, iss joo werklich präschdisch fiers Au. Awwer aach e ziemlicher Schogg fier unser mobili Gesellschaffd. Mer merkts an de panische Reaktione in de effendliche Verlautbarunge. Vun Chaos iss doo die Redd, unn dass de beese Winder gnadelos zuschlaan werrd. Odder sie bemiehe immer widder de Sport-Schaargong: es Wedder hädd alles im Griff. So wie die Ringer ihr Geeschner im Schwiddskaschde. Weil emm trotz de Temberaduure beim Schneeschibbe die Brieh erunner laafd. Wie ich das geheert hann, doo hann ich fier mich gedenkt, denne doo Spruch haschde doch schunn irjendwo mool gelääs. Unn richdisch: uff de neije Mülltonne sinn so frehliche Männer abgebild unn denääwe steht: Alles im Griff! Awwer doo iss das nadierlich positief gemennt. Awwer weil der doo Winder so hinnerhäldisch frieh unn iwweraschend kumm iss, issne in Dengmerd unn annerschdwo jedds schunn das Zeich zum Straue ausgang. Es iss faschd wie im Middelalder, wo jo aach es Salz e ganz koschdbaares Gut war. Unn weil joo Dengmerd an der Periferie ringserum ziemlich in die Heeh gebaut iss, doo kried uff äämool die Bezeichnung Ausfallstroose e ganz neiji Bedeitung. Mer kann nadierlich all die arme Leid nur bedaure, wo bei dem Wedder unbedingt enaus misse in die weise Pracht. Unn wo dann statt gemiedlich unnerm Tannebäämche in rer riesisch Fluuchzeichhall hugge. Wer bei dem ganze Schlamassel noch am beschde wegkummt, das iss die Bahn. Jedds hann die doo weenischdens e halbweechs inleuchtende Entschuldischung doodefier, dass die Ziech immer se spät kumme. Unn es iss e saffdischi Redduurkuddsch fier all die, wo sich im Summer beschwert hann, die Abteile wäre se heiß.