Doo hann ich hie in der Zeidung e lusdischer Ausspruch gelääs. Wo e Bolidigger gesaad hadd, midd der deutsch Sprach wärs wie midd seiner Fraa: Er werrd se liebe, awwer nidd beherrsche. Das geht wahrscheins noch meh Leid so. Mir verlange hie bei der Innbürgerung, dass doo noogewies werrd, dass jemand midd der einheimisch Sprach umgehn kann. Awwer wer wääs ob mir selwer bei soome Tescht so doll abschneide wirde. Weil graad unser Sprach joo bekannt defier iss, dasse midd ganz verknoddelde unn vertraggde Stolperstään geplaschderd iss. Isses nidd kloor, dass die höhere Schul nidd so hoch iss wie die die Hochschul. Odder e älderer Herr nidd so alt wie e alder Mann. Wann e Schweinekottlett e Stigg Flääsch vum Schwein iss, was iss dann e Jäächerschniddsel odder e Bauernommlett? Das will mer sich liewer nidd vorstelle. Ganz se schweiche vumme Senjoreteller odder Frauefriehstigg. Speiseeis iss joo Eis, wo mer verspeise kann, awwer e Speisekaard iss eejer unverdaulich. Unn was hadd e Fischgericht middem Amtsgericht gemeinsam? Apropos Amt: uffem Arweddsamt soll mer aangeblich Arwedd krien. Awwer hann sie vielleicht schunn mool Finanze vum Finanzamt kried? Unn weil das im Deutsche so kombliziert iss, doo drigge sich manche Leid heid liewer uff Englisch aus, das iss scheins äänfacher. In Dengmerd hadd amme defeggde Parkaudomaad so e Schild gehong: Out of order. Ich hann doo rumgerätselt was das bedeite kinnd unn hann in meinem Unverstand gemennt, es hääscht außerordenlich. Bis mich ääner uffgeklärt hadd, dass die doodemidd saan wollde, dass ebbes nidd ganz in Ordnung wäär. Unn doo kunnd ich mir die Bemergung nidd verkneife: Das kannschdu awwer laut saan!