| 21:19 Uhr

Dengmerd als Welt-Stadt

Mer kummt joo heidsedaach als Glosse-Schreiwer aarisch in Verleeschenhääd. Mei Kolleeschin, die Spott-Drossel hadd mir das graad aach widder beschdäädischd. Weil mer die satierische Iwwertreiwunge, wo mer sich krampfhaffd aus de Fingere sauche duud, am näägschde Daach dann in der Zeidung lääsd

Mer kummt joo heidsedaach als Glosse-Schreiwer aarisch in Verleeschenhääd. Mei Kolleeschin, die Spott-Drossel hadd mir das graad aach widder beschdäädischd. Weil mer die satierische Iwwertreiwunge, wo mer sich krampfhaffd aus de Fingere sauche duud, am näägschde Daach dann in der Zeidung lääsd. Unn die Leid, wo mer e bissje uff die Schibb holle wolld, die produziere die Kalauer neijerdings selwer. Dass unser Stadt e spezielles Fleggche iss, dass hadd sich joo schunn erummgesproch. Merkwirdischerweise kinnd sich Dengmerd awwer sogar Welt-Stadt nenne. In der Siddie hannse nämlich jedds offiziell e Welt-Laade inngeweiht. Wo mer Schbeezereie ausem Orient unn Ardiggele aus alle Himmelsrichdunge innkaafe kann. Zuume reelle Preis, also ennem wo bei de Hersteller aach noch ebbes hängebleibt. Unn das iss e guddes Gefiehl, wammer saan kann: ich hann heid mool widder fair gehannelt. Unn als Nääweeffeggd werrd uns nochmool bewusst, dass mir all middenanner uffem selwe Globus lääwe. Iwwrischens de äänzische wo mer derzeit hann. Unn dass die meischde vun uns im Vergleich zu annere Weltgeeschende uff ziemlich hohem Niewoo joomere. Dass es awwer aach bei uns immer meh Leid gebbd, denne woos am needischde fehlt, das lassd sich nimmeh verheimliche. Unn desweeje gebbds jedds neierdings aach in Dengmerd e sogenenndi Tafel, wo denne geholf werre soll, wo in unserer Gesellschaffd an de Rand geschubbsd werre. Mer saad joo oft, wammer midd so Probleeme konfrondierd werrd: Mer derf garnidd driwwer noodenke! Desweeje isses um so bewunnerswerder, dasses angaaschierde Leid gebbd, wo nidd lang iwwerleewe unn drummrumschwäddse. Unn äänfach ehreamtlich ebbes uff die Bään stelle.