De allerleddschde Schrei

Jedds isse mool widder vorbei, die Faasenacht unn es iss Schluss middem Verbooze. Die Narreklääder werre in de Schrank gehängt unn mir schlubbe nochmool in de alde Adam. Allerdings hann sich die Wortfiehrer ausem effendliche Lääwe direggd noo de tolle Daache schunn widder um die salzische Heringe versammelt. Unn sie kumme weeje de Faschdezeid dann all tradizioonsgemääs in Sagg unn Asche

Jedds isse mool widder vorbei, die Faasenacht unn es iss Schluss middem Verbooze. Die Narreklääder werre in de Schrank gehängt unn mir schlubbe nochmool in de alde Adam. Allerdings hann sich die Wortfiehrer ausem effendliche Lääwe direggd noo de tolle Daache schunn widder um die salzische Heringe versammelt. Unn sie kumme weeje de Faschdezeid dann all tradizioonsgemääs in Sagg unn Asche. Awwer aach sunscht hadd mer manchmool es dumpfe Gefiehl, es wär es ganze Johr iwwer Faasenacht. Doo hann ich jedds iwwer so e neijer Modetrend aus England gelääs, wo die Leid sich garnimmeh groß middem Anzieje uffhalle. Unn äänfach im Schloofanzuuch uff die Stroos unn zum Inkaafe gehn. Dass die dort denne Fummel Püddschaama nenne, heert sich zwar e bissje vornehmer an, ännert awwer nix an der Tatsach, dass die offensichtlich änner an der Waffel hann. Ich menn, in de leddschde fuffzisch Johre hann sich die Geschmägger in punkto Dame- unn Herre-Owwerbekleidung joo aach bei uns meh so in Richdung logger-floggisch entwiggelt. Das sieht mer zum Beispiel aach bei denne Dschiens-Buxe, wo se sogar kinschdliche Lecher eninnmache. Das iss so ähnlich wie beim Schweizer Kääs. Je mehr Lecher um so deirer.Was fier Klääder mer aanzieje soll, das bestimmt die Mode. Unn die kennt joo nur ääni Dewiese: immer ebbes Neijes. Wannse nidd graad de Fummel vunn vor 20 Johr widder auskramt. Der iss in dem Fall awwer nimmeh altmodisch, sondern de leddschde Schrei. Unn manchmool iss das dann aach zum Schreie. Vunn weidem sieht nämlich so jemand im Naachdshemd aus, als wanner graad aus der Anstalt ausgebüxt wäär. Awwer, wie de Aff gesaad hadd, der wo in die Sääf gebiss hadd: alles Geschmaggsach!

Meistgelesen
Neueste Artikel
Zum Thema
Aus dem Ressort