Das wääs nidd jeeder!
Es iss, wies iss: Was mer will, will mer, was mer hadd, hadd mer, was mer wääs, wääs mer! So saad mer bei uns, wann ebbes iss, wies iss unn wanns bleibd wies iss – die gans glään Saarland-Fillesefie – dsem Midschreiwe, fier de Buggsesagg unn iwwerhaubd: Rischderaus gesaad unn gudd iss! Mier sinn, wie mier sinn unn mier bleiwe, wie mier bleiwe. So sinn die Saarlänner, nidd annerschd! Mer saad, was mer saad unn mer duud, was mer duud.
Nidd sevill unn nidd se weenisch! Mier schaffe bei uns so vill, wie mer muss unn so weenisch wie mer kann, will heische, so vill wie mer kann unn so weenisch wie mer muss. Das isses, was dsähld: Nidd sevill unn nidd se weenisch! Immer die Midd finne unn nie drunner- unn driwwernaus gehn! Danne bischd e rischdischer Saarlänner, wannde das geschnalld haschd. Bei uns genn Leid, die kää Dseid hann fier niggs dse duun, schief unn schebb aangeguggd. Mer muss aach mòò Finf graad sinn lasse, aach wann de Finfer kää graade Dsahl iss. Kann se ebbes defier, die Finf? Nää! Känne die Saarlänner ebbes defier? Also! Es iss hald graad so kumm, dass die Finf nidd graad iss unn dswische die Vier unn die Seggs gemuddscheld genn iss. Soll mer se dòòdefier grumm holle? Im Lääwe nidd! Mer muss aach die Finf mòò graad sinn lasse, weenschens so e bissje. So iss das im Saarland: Lääwe unn lääwe lasse, die grumme unn die graade Dsahle. Mier känne jeeder brauche, unn wanns nuur fiere schleschdes Beischbiel iss - wie beim Finfer. Das wääs nidd jeeder im Reisch! So sinn se,die Saarlänner: Se wisse, was gudd iss! Unn ääns noch: Wann Schluss iss, iss Schluss! Ferdisch!
Georg Fox schreibt in rheinfränkischer Mundart. Buchveröffentlichung: "Saa, was de willschd!" PVS-Edition. Nächste Lesung: Nalbacher Künstlertreff am 17.10., 20 Uhr. Infos unter Tel. (0 68 38) 8 31 73.
