Awweile werrds awwer Herbschd
Graad hann die ääne noch beschwingt bei der Sommerserenade uffgespielt, doo feiere die annere schunn es Oggdoowerfeschd. Das wo joo tradizionell unn komischerweis immer ausgerechend im September stattfind. Unn die chronologisch ganz Fortschriddliche unn Iwwereifrische pagge schunn mool die Weihnachtsdeggorazioone aus
Graad hann die ääne noch beschwingt bei der Sommerserenade uffgespielt, doo feiere die annere schunn es Oggdoowerfeschd. Das wo joo tradizionell unn komischerweis immer ausgerechend im September stattfind. Unn die chronologisch ganz Fortschriddliche unn Iwwereifrische pagge schunn mool die Weihnachtsdeggorazioone aus. Was joo besunnerschd passend iss, wann drause die Temberaduure nochmool uff Kleddertuur gehn. Das iss dann de Moment, wo aus de Kulisse de Beckenbauer ufftaucht: Ja iss dann heit scho Weihnachten?Awwer aach wann am vorische Freidaach offiziell de Herbschd aangefang hadd, es Johr iss noch längschd nidd erum. Uunn mir losse uns doo aach vunn denne, wo kalennermääsisch nidd ganz richdisch tigge, nidd zwäää ganze Monaade äänfach klaue.
Mer wääs awwer ball werklich nimmeh, an was mer sich halle soll, wo die Johreszeide so dorchenannerborzele. Unn wann nidd die Ingobertus-Mess unn hinnerher die Kerb ihr feschder Platz uffem Terminkalenner hädde, kinnd mer richdisch wurres werre. Unn dann werrd aach irjendwann nochmool die Uhr umgestellt. Unn mer wääs nimmeh nimmeh genau, ob vor odder serigg.
Unn die Naduur losst sich scheins aach schunn aanstegge. So frieh wär es Laab noch nidd abgefall, saan se. Awwer in de Bääm im Gaarde hängt die Pracht, was joo an sich e scheener Zuuch vunn dem Obst iss. Mer musses halt nur noch abmache. Awwer mei Freind, de Schorsch, wo so e scheener Birnbaam hinnerm Haus stehn hadd, hadd doodruff kää Luschd. Das wäre nämlich Energiesparbirne, saad er. Unn wie ich doo dumm geguggd hann, hadder gemennd: Doo missd er joo extra e Lääder beischlääfe unn doo nuff kraxele. Unn die Energie werrd er sich garandierd spare.
