Mundart-Kolumne Arme Schweine

Früher war alles besser: Unser Autor Günther Hussong wünscht sich in Zeiten von Negativzinsen das gute alte Sparschwein zurück.

Saarbrücker Zeitung Kolumne Saarmòò
Foto: SZ/Müller, Astrid

Als junger Buu war fa mich de Weltspardaa am 30. Oktower immer ebbes ganz Besonneres. Sellemools hann die Bankangestellte noch Handberschte unn Dreckschibbe gebraucht, fa die Schäärwele vun de Kinner ehre Sparschweine sammesekehre. Wie ich e bissje elder war, bin ich sogar noch efter uff die Kass, well dort e junges „Ding“ als lewennisches Argument gää Homebanking am Schalter gestann hat.

Unn aa in de eerscht Januarwuch war am Bankschalter e Stau, wie ma ne heit noch iwweraal uff de Autobahn erlääwe kann. Doo hann äldere Leit die Zinse uff’s Sparbuch intraan losse, wie wann se Angscht gehat hätte, e Wuch später gääb‘s kenn meh. Zwäämoo hann die joo aa erlääbt gehat, dass se ehr ganzes Geld iwwer Naacht veloor hann.

1960 war ich reich; uff meim Sparbuch ware iwwer hunnert Mark – unn im Januar sinn noch fascht nein Mark Zinse, also sechs Fahrte in de Geischterbahn, dezukomm. Heit hann ich de Verdacht, dass mei Geld irjendwo eromgeischtert unn annere demet Achterbahn fahre.

Mei Oma, frieher mei Hauptsponsorin, hat immer gesaat: „Spar in de Zeit, dann hasche in de Not“. Fa sie war ‚Not` awwer Hunger – fa mich zu wenisch Geld fa die Käärb. Jetzt misst das Sprichwort hääße: ‚Negativzinse vum Schwein hole die Inflation nie in‘ – das iss net nur vun de Sprooch her ungereimt.

E Sparschwein iss heit e armes Schwein. Kenn Kind schmeißt meh ebbes eninn, fa dann kenn Zinse se krien. Met Minz, also Kleengeld,  bezahlt sowieso kaum noch jemand. Unn wammer die Bankkart in de Schlitz von de Wutz steckt, bringt emm das net weiter.

Uff‘s Sparbuch duun ehr Geld nur noch die Leit, wo‘s zum Fenschter enausschmeiße wolle. Spare iss joo aa net gut fa‘s ‚Konsumklima‘. Deswää gewwe Banke de Kunne ganz billische Kredite – ma muss ball weenischer serickbezahle wie ma kriet. Fa mich iss das gut: mei Konto iss meischtens im Defizit -– das iss das, was de wenischer hascht wie de häscht, wann de gar nix häscht.

Mei Fraa duut mich oft zum ‚Shopping‘ (deitsch: ‚Demonetisierung‘) vegattere. Ääs saat, ich däät immer schelle, ’s Geld wär nix meh wert; dann kennte ma‘s aa gleich vepulwere. Unn ‚s stimmt joo: ma muss die Wärtschaft ankuurwele – ich hann schun frieher viel Wärtschafte unnerstitzt.

Neierdings misse Banke sogar 0,4 Prozent Stroofzinse an die Zentralbank bezahle, nur fa ehr Geld dort se laachere. Doodebei däärfte se das uff meim Konto schun fa 0,1 Prozent!

Günther Hussong hat gerade seine neue Mundart-CD ‚Awwei werd‘s Zeit‘ herausgebracht.

Meistgelesen
Neueste Artikel
Zum Thema
Aus dem Ressort