Zuminneschdens was die Radfahrer aangeht, soll de Verkehr in Dengmerd joo jedds umgekrempelt werre. Indemm dass die in Zukunft aach verkehrterumm in die Inbohnstroose eninnfahre derfe. Es iss joo gudd, dasse fier es biodinnaamische Immiddsch vunn der Stadt ebbes mache unn die Beweeschung per pedales fördere duun. Awwer ich vermuude mool, dass das einische Pee-Ess-Fäns doch ziemlich geeje de Strich geht. Weil mer joo das, was zwische de Audofahrer unn de Radfahrer verkehrmääsisch herrschd, nidd graad als diggi Freindschaft bezeichne kann. Wobei mer nidd ganz genau wääs, wer denne Krach aangefang hadd. In soome digge Brummer iss mer nadierlich vun der Kampfkraft her stragetisch schumool schwäär im Vordääl. Awwer aach mancher Radfahrer huggd uffem hohe Stahlroß unn mennt, er geheert audomadisch zu de Gudde. Aach wanner midd Karacho durch die Fußgängerzoon bredderd. A beschde oowens ohne Licht. Unn de arme Fuusgänger, an denne wo bei dem Konkurrenzkampf kenner denkt, der saad sich: Wie entgegenkommend! Unn nemmt die Bään in die Hand. Wohingeeje so e Autofahrer joo meh zuvorkommend iss, vor allem wanner die Vorfahrt schneide duud. Ich menn, am allerbeschde kinnd mer das Dilemma vielleicht beheewe midd Riggsicht. Awwer nadierlich nur wannse all mitmache. Weil Riggsicht joo bekanntlich kää Inbohnstroos iss.Awwer wer wääs, vielleicht steije bei denne Benzinpreise die ganze Audofahrer ball uff Drohtesel um. Wo joo zur Zeit graad zum Audofaschde uffgeruuf werrd. Ganz besunnerschd schlau machts mool widder mei Freind Schorsch, de Allerschlankschde. Ihne juckt de Heejefluuch vum Benzinpreis weenisch, so saad er, weil er sowieso immer nur fier 20 Euro tanke geht.