Kolumne SAARMÓÓ „Anstännisch esse“
Saarland · „Nicht jeder, der ständig anständig isst, ist anständig“ – unser Mundart-Kolumnist über die Vorliebe von korrupten Funktionären für gutes Essen, das sie gerne geschenkt bekommen.
Saarlänner nemme uffenanner Ricksicht. Deswää werre bei uns Peschtcher oft aa doppelt vegebb, dass nimmand beleidischt iss. Beim Roulett hääßt's „Rot odder Schwarz“, bei uns „Rot unn Schwarz“, oft gewinnt sogar e „Null“. Kenn Wunner, wann so e Spielbank pleite geht: die Spieler kenne joo gar net veleere. Wann ma die rischdische „Freikarte“ in odder an de Hand hat, kried ma Sitzplätz (Peschtcher) in de eerscht Reih als Direktor, Präsident odder Vorsitzender in Vewaltungs- unn Uffsichtsrät, zum Beispiel beim Saartoto, beim EVS, bei de Landesbank odder wääß Gott wo.
Als Kind hann ich gesaat kried „Ess anstännisch! Nemm e Messer, e Gawwel unn e Serviett. Unn mach de Mund net zu voll!“. Später krien manche Leit de Rache net voll genugg unn nemme aa kenn Blaad vor's Maul. Wie oft saat jemand: „Ich hann nur laut gedenkt“, obwohl er gar net gedenkt hat. Ma kennt joo moo die Klapp halle, wann ma nix se saan hat. Awwer dann wäre Talkshows Stummfilme.
Im Saarland hääßt's „Hauptsach gut gess“. Bei offizielle Feiere werd oft aa anstännisch gess met e paar hunnert 'geladne' Gäscht met Parteibuch odder met Peschtcher - was sich meischtens iwwerschneid. Jeder, wo Steiere unn Beiträäsch bezahlt, iss dann Sponsor unn aa 'gelad', well sei Geld eischentlich fa annere Zwecke geplant war. Deswää kann ma saan (das geht jetzt nur in Hochdeitsch): „Nicht jeder, der ständig anständig isst, ist anständig“.
Jemand hat vor korzem an Silveschter e 'guter Bekannter' zu sich dehemm ingelad, well der de 'Ludwischspark' - fascht fa nix - omgebaut hat. Demm hann die Hoorische unn's Billischbier gut geschmeckt. Deswää hatter sei Koffer met e paar hunnertdausend Euro im Haus vegess – ohne dass de Hausherr monatelang ebbes gemerkt hat. So dolle Bekannte hann ich lääder Gottes net.
Ich gehn selte in deire Lokale – ich misst joo alles selbscht bezahle. Unn met „Fliege“ (Riwwer-Niwwer-Schlippche) die Mick se mache iss net mei Ding. Zieh ich e Schlupp an, saat Meins: „Duu net met de Supp schlabbere, sunscht duusche uff de Schlupp sabbere.“ Schwätzt ma im Nobellokal net Hochdeitsch, kann das peinlich werre. Eemoo hat ma die Bedienung nur drei kleene Grumbeercher uff de Deller geleet, Ich hann in meim beschte Hochdeitsch gefroot: „Herr Ober, gängten Sie mir die Grumbeeren aus der Schissel allegar geben?“ Der hat nur schroh gesaat: „Gauben Sie, ich würde Sie roh servieren?“
Info Günther Hussong lebt in Kirkel-Neuhäusel und schreibt in rheinfränkischer Mundart. Mehr unter www.mundart-saar.de
