Nennt ma jemand „grooie Maus“, iss das net grad e Kompliment – awwer e „bunter Vochel“ iss bestimmt net schlauer. Grooe Klääder sinn unufffällig, awwer aa dezent unn vornehm – sieht ma moo vun Jogginghose ab. Unn de Deitsche ehr Lieblingsfarb bei Audos iss groo. egal, wie bunt ma‘s hann wolle.

Groo iss e Mischung vun Schwarz unn Weiß – moo heller, moo dunkler. Obwohl‘s in de Mitte leit, steht‘s nie im Mittelpunkt. Heit kenne viel Leit lääder Goddes nur Schwarz odder Weiß – ma muss kenn Hellseher sinn, fa schwarz se siehn.

Die Wohrhäät leit awwer fascht immer im grooe Bereich, in de Welt iss selte ebbes ganz schwarz odder weiß. Trotzdem wolle viel schnelle unn eenfache Antworte, fa net lang iwwerleje se misse. Ma iss immer uff de Seit vun denne, wo denke wie ma selbscht. Das iss joo bequem – ma wääß schun vorher, wer „Freind“ odder „Feind“ iss. Unn so hacke immer meh Leit, wo veschiedener Meenung sinn, uffenanner rom, statt uffenanner insegehn. Veninfdische Leit, die im grooe Bereich, brauche Kurraasch unn Vestand. Fa die eend Sort vun Fanatiker sinn die net weiß unn fa die anner Sort net schwarz genungg. Awwer Friedensdauwe sinn net weiß – sie sinn groo. Bunte Paradiesveschel falle zwar uff, plappere awwer oft nur noo, was annere vorsaan.

Wää‘m Schwarz-Weiß-Denke geht’s vor Wahle bunt zu – ma kann sei blooes Wunner erlääwe. Ich losse ma kenn grooe Hoor wachse. Die eene wähle die Schwarze, fa annere sinn die e rotes Duuch.

Viel Leit siehn fa die Rote schwarz – bei denne muss ma uffbasse bei de Groß- unn Kleenschreiwung: „rote Bete“ bedeit ebbes ganz anneres wie „Rote bete“. Hinnerher komme Vehandlunge iwwer meeschlische unn unmeeschliche Koalitione vun grien, schwarz, rot unn gääl. Sinn sich Schwarze, Rote unn Gääle net grien, werd‘s bunt. Viel Wähler ärjere sich dann grien unn bloo.

Mehr Informationen über „Plattmacher“ Günther Hussong findet man auf seiner Homepage unter www.mundart-saar.de