Mundart-Kolumne Ordnung mid de Dseddel!
Isch hann leddschdens ääner kenne gelehrd, der hadd fier die Ordnung im Haus e eischnes Dseddel-Sischdeem erfunn. Dò hann isch mier gleisch e ganser Blogg mid gääle Dseddel kaaf, die woo mer iwwerall hinbabbe kann.
Fier die Wuch wischdisch iss de Inkaafdseddel. Der iss ingedääld in Grummbiere, Nuudele, Gemies unn Obschd, Milsch, Wurschd unn Kääs, Droggeriesache unn Buddsmiddel. Dann gebbds aach noch de Nääwebei-gesaad-Dseddel, woo ebbes fier de näggschde Mommend uffgeschrieb gebbd: „Kellerfinschder dsumache! Inkaafsdasch midholle! Ooma aam Buss abholle! Es Glään kummd de Nommiddaa um vier!“
Manschmò glääbd aam Dellefoon e Dseddel, fier dass mer mò ääner aanruufd. Unn aan der Dier hängd e Dseddel, dass mer beim Weggehn nidd vergessd, de Milläämer midseholle odder all Finschder dsuudsemache. Es gebbd aach noch de Schdadd-Dseddel, was mer in der Schdadd dse kaafe odder nuur mò dse gugge hadd. De Schdadd-Dseddel iss in der Dseddelwirdschafd so ebbes wie de Feierdaach vun all Dseddele. Dò kaafd mer ebbes, wasses uffem Dorf nidd gebbd. Unn mer muss noch achdbasse, dass mer sisch nidd wer wääs vun was logge lassd unn so.
Danne gebbds noch Dseddel, woo die Fraa irjendwoo hinbabbd. Das sinn so glääne Erinnerunge fier die Milltonn odder fier de Geburdsdaach vun demm ään odder anner, denne woo mer nidd vergesse därf. Uffem Schreibdisch glääwe Dseddel, was mer gans wischdisch mache muss. Wann die Fraa saad: „Isch hann der e Dseddel geschrieb…“, danne wääs mer: Es gebbd kää Widderredd! Annere Dseddel leije aam Naachdsdisch: Dò sinn die ganse Infäll druffgeschrieb, die ääm in der Naachd in de Kobb kumme. Meischdens hädd mer jò alles vergess de näggschde Mòòrje, weil in der Naachd kumme ääm die beschde Iddeeje.
Die scheenschde Dseddele sinn die Räädsel-Dseddel. Dò muss mer rausfinne, was mer dò mò irjendwann uffgeschrieb hadd. Bei demm ääne kann mer sei eischne Schrifd nimmeh lääse, weil mer wie e Dogder geschrieb hadd unn die annere kammer lääse, wääs awwer nidd, was das heische soll. Sammelpunggd vun wischdische Dseddele iss die Pinnwand: Dò gehds gans wurres dsuu! Mer finnd glääne unn groose Dseddel, Ausgeschniddnes aus der Dseidung, Vissiddekaarde, Blään unn Gwiddunge. Alles Uwweraasch, dass mer beinäggschd schunn vunnem Gesamdkunschdwergg schwäddse kännd. Wann mers jeddse rischdisch holld: „Mid ohne Dseddel wäär isch gladd verlòòr!
Georg Fox schreibt in rheinfränkischem Dialekt. Neueste Veröffentlichung: „Saarlandfarben“. (Weitere Infos unter www.edition-schaumberg.de und www.nachtgedanken-saarland.de).
