Kolumne Saar móó Wenisch Gligg beim Kligg? – Tande Emma 5.0
Das Internet hat die Einkaufsgewohnheiten unseres Mundartkolumnisten verändert – jetzt wünscht er sich die alten Zeiten zurück.
Meh wie zwei Driddel vun meine Jòhre läb isch im‘me Ord vun gudd 3000 Inwohner. Má hann zwei Ärzd, zwei Zahnärzd, e Abodeeg unn kaafe de Daachesbedaaf im Ord. Nidd iwwel! Awwer känn Vágleisch mid Zeide, wo’s noch Tande-Emma-Läde genn had, im Ord vádääld, dezu Bägger, Medzjer, Drogerie, Klääder, Wäsch, Schuh, Uhre unn Schmugg, Dibbe unn Geschirr, Wergzeisch, Tabeede unn Boddembelääsch, Fodograf – unn e Schuschder. Beròòd hann disch Leid, wo dá ach nòòm Kassiere noch grad in die Aue wollde gugge kinne. Wischdisch, grad bei Elegdrogeräde, die se ach flink gefliggd hann, z.B. unser aldes Fernsehgeräd. Sunschwo hädd‘s billischere genn. Awwer es had in 26 Jòhr äämòò e Ersadzdääl forr 30 DM koschd; alles annere had de Meischder mit Schrauweziehjer unn Leedkolwe gefliggd – unn zwaa „so“, ohne Koschde.
Wie so ofd: Rischdisch se schädze had má’s eerschd gelernd, wie’s weg waa. Annererseids: Isch hann Jòhrzehnde in Sabrigge in dá Bahnhofstròòs geschaffd unn mussd hald mansches dòò kaafe, weil dehämm die Geschäfde um sechs zu ware. Umso scheener: De Fordschridd schenkd uns es Inderned. Jedz kann isch sogaa dehämm kaafe. Krien alles in bunde Bilder vòrgefihrd unn ins Haus gebrung, muss „nur“ kligge unn bezahle. Unn zum Kligge ach Gligg hann. Weil: Vun nah siehn unn aangreife is doch sischerer wie Bildschirm-Schummelei. Schreibsch de e schleschdi Bewärdung, halld die Firma bei Spezial-Gauner gekaafde zehn gudde degeje. Unn „ins Haus bringe“... Scheen gesaad – awwer!! Was fangschd de aan mid „Lieferung zwischen 9:28 und 21:58 Uhr“? Awwer ach uff die Minudd genau Aangekindischdes kann zwei Daa späder kumme. Odder de krischd e Mail „wurde einem Hausbewohner übergeben“. Dann gehd es Suche los: In welschem Haus? Bei dir nämlisch nidd! Leid’s in dá Babiertonn? Hinner dá Biotonn, dá Blumeschal? Uff dá Finschderbank vum Klo? Dann finnd’s de Nachbaa in seiner Garasch. Nidd gudd, awwer was mache, wenn de ans Haus gebunn bischd unn nimmand schigge kannschd odder willschd?
Wenn isch dann so rischdisch die Flemm hann, winsch isch mir so ebbes serigg wie dòòmòòls. Selbschd de Name Emma is widder modern. Dann kinnd’s doch ach widder so pragdische Läde vòr dá Hausdiir genn. Die braischde jòò gaanidd alles, was es Indernedd bied; nur das, was mir brauche. Awwer dann peedz isch misch in de Aam unn fròòe: Vun was träämschd du naachds? Ach Tande Emma ...!
Peter Eckert schreibt in Saarbrigger Platt.
