Irjendwoo in der Midd leie die Kabbiene-Geschbrääsche. Die gebbds immer, wann mer ebbes heerd, was mer eischendlisch gaar nidd heere solld. Dò huggd mer veleischd irjendwoo uffem Gloo vun der Wirdschafd odder uffem Bahnhoof, unn nääwens in de Kabbiene unnerhalle se sisch, während dass se e Geschäfd mache. Veleischd heerd mer dò ääner saan: "Isch hann sevill Kaffee gedrungg, jeddse blòòsd der mier die Gedärm dursch!" Kabbiene-Geschbrääsche gebbds aach, wann mer im Peekaa iss unn ausbrowwiere muss, woomid Ääs disch in die Umglääd-Kabbien geschiggd hadd. Dò heerd mer vun nääwens veleischd so Sädds: "Bei der dò Buggs muschde noch de Hinnere rauslosse! Sunsch schdremmds sevill in der Graddel." Odder ääner saad: "Holl mò e greeser Jubbe, bei demm dò hann se die Gnäbb dse eng aangenähd."

Mer glaabd jò faschd nidd, was die Leid alles in der Kabbien schwäddse. Isch gugg mer nòhäär als immer aan, was das fier Leid sinn, die so unschennierd ruufe: "Mer missd eischendlisch mò widder die Tande besuuche. Dò waare mer schunn eewisch nidd gewään. Am Enn lääbd se nimmeh bis mier kumme." Kabbiene-Geschbrääsche sinn ebbes rischdisch Scheenes, weil mer dò midgridd, was annere wirglisch dengge. Leddschd waar isch im Schwimmbaad unn ääner hadd aus der Kabbien gegrisch: "Isch hann mei Unnerbuggs middem Rallischdreife verkehrd erum aangedsòò." Nuur gudd, dasser sei rischdisch Buggs driwwer gehadd hadd, wierer aus der Kabbien rauskumm iss!

Georg Fox schreibt in rheinfränkischem Dialekt. Er hat kürzlich die Hörbuch-CD "Òòmends schbääd" veröffentlicht.