Also nää, die doo Sort
Aufgepickt · Wann sie de Kobb schiddele, dasses awweile schunn es Weihnachtsgebägg se kaafe gebbd, doo losse se sich das mool vumme einschläächische Experde verkliggere. Das wär nur weeje der Sordimends-Bolidigg. Mer schwäddsd joo nidd umsunschd vum gudd sordierde Fachhannel. Beim Obst zum Beispiel gebbds zisch verschiedene Sorde. Unn jee noodemm, wie die Äbbel aussiehn unn schmagge, zerfalle die in unnerschiedliche Güteklasse. Das iss dann faschd so ebbes wie vegetarischer Rassissmus. Mer kennt joo die entsprechende Sprich: Nur die Haarde kumme in de Gaarde. Odder: Die gudde ins Töpfche, die schlechde ins Kröpfche.
Ganz vornehm gehts bei manche Produggde zu, wos dann sogar edle Sorde gebbd: Beim Wein, bei der Schoggelaad unn de Pralinees unn sogar bei de Grumbeere. Dasses iwwerhaupt so vill Sorde gebbd dass leid doodraan, dass die Geschmägger so verschieden sinn.Aach als Privatmensch duud mer im Alldaach als mool leicht die Iwwersicht verliere. Unn desweeje saad mer sich: Ich muss mich seallereerscht emool sordiere. Dass ich nidd widder alles verschdruddele.
Bei der Poscht hannse sogar eichene Maschine zum Insordiere vunn de Briefe. Die kumme dann in verschiedene Schublade. Unn doo gebbds e klarer Arbeitsablauf: Schublaad uff - Kandidaad eninn - Schublaad zu - Edikedd druff. Wammer so ebbes midd seine Mitmensche mache werrd, doo nennt mer das Vorurdääl.
Apropos: Mei Freind Schorsch, das iss aach e ganz besonneri Spezies. Dooher kummt aach der Ausdrugg: mei Spezie. Awwer der iss joo sogar noch stolz doodruff. So Leit wie er, die werde heit garnimmeh gemacht. Joo Schorsch, hann ich gesaad, dann kann dir joo nix meh passiere. Doo fallschd du joo unner de Arteschudds.
