Dass misch sei Blingge nervd, juggd ne nidd. Er blinkd unn blinkd. Mache má’s kurz: Finf Mòò werd’s links griin, bis má vòre stehn. Unn beim sechsde Griin? Eerschd passierd gaanix; dann fahd á los, awwer nòò reschds, unn dord mähd á beinah die Fuusgänger um, wo jedz griin hann. So weid, so schleschd. Awwer wie isch mid Kobbschiddle halwer ferdisch bin, blidzd in mir e Gedangge uff: De Debb bin isch! Begriff, wie die Weld laafd, had der Blingger!

E Thema aus de ledschde Daache: Allään an Grundschule fähle 26.000 Lehrer. Nidd nur 15.000, was schlimm genuch wär. Seid Jòhre unn Jòhrzehnde sinn se all äänisch: Es muss ebbes passiere! Awwer was? Schlau schwädze, unn es Gejedääl mache: Blingge, blingge, blingge ... Wie waa das mid em Personal in de Kranggehaiser? Wer’s aus dá Näh sidd, wääs: Dòò sinn vill se wenisch Leid; unn ob die, wo dòò sinn, aanstännisch bezahld werre, dòò mache má e grooses Fraachezeische. Es werd schwaduddeld, also: Blingge, blingge ...! Dasselwe beim Fleesche vun alde Leid, im Heim odder dehämm. Blingge ...! Fähld nidd ach Polizei? Kummd má mid Bus unn Bahn hin, wo má hin will odder muss?

Odder unser Stròòse, im‘me Zustand wie frihjer am Enn vun dá Weld. Dòò muss má ebbes mache! Odder: Má solld die Umweld nidd weider vágifde, bis die ledschde Biene unn Veeschel aach noch dood sinn. Odder: Dass Konzerne Steiere bezahle, wo se ihr Gewinne mache. Odder: Billische Lebensmiddel unn Texdilje uff Koschde vun aame Leid in aame Länder. Dòò missd was passiere! Unn was? Blingge, blingge, blingge ...!

Weil mei Pladz knabb werd; noch dabber das, wo bei mir endgildisch de Grosche gerudschd is. Das waa bei meim Friseer, me Angler. For denne is e Blingger e Köder. De Fisch männd, er schnabbd ebbes Guddes – unn is schunn rinngefall! Awwer dass das nidd nur bei Fische so is: Jedz hann isch‘s kabierd.

Peter Eckert schreibt in Saarbrigger Pladd.