Hann Sie eichendlich ihr Weihnachtsfeiere schunn hinner sich? Also nidd die im traute Familiejekreis. Ich menn meh so die vorweihnachtliche Termine, die wo sich doodraus ergewwe duun, dass mer sozial schwäär vernetzt iss, wie mer heid so scheen saad. Die ganze Vereins- unn Betriebsfeiere vor de eichendliche Feierdaache. Wo mer quasi gezwung iss fier doo hinnsegehn unn die wo unweigerlich imme abschliesende gemiedliche Beisammesein ende. Als stadisdisch durchschniddlischer Saarlänner ist mer joo minneschdens imme halwe Dutzend Vereine Mitglied unn doo gilt dann im Dezember es obligatorische Versammlungsgebot im Nääwezimmer vum Vereinslokal. Wo awwer vorher seerschd emool de Vorstand noch e extrem ausfiehrlicher Riggbligg uffs verflossene Johr abgebbd. Bei de ganz Muudische werrd sogar noch e Weihnachtslied gesung. Was sich awwer weeje mangelnder Textkenntnis gewehnlich uff die erschd Stroph beschränkt. Hinnerher gebbds noch e Tombola, wo jeder ebbes mitbringt. Doo kanns emm dann passiere, dass mer sei Nachelfleesche-Set widder mitnemme kann.

Aach in de Birros versammelt sich um die Johreszeit gääre die Belegschaft um Gliehwein unn Spritzgebaggenes unn produziert innerbetrieblichi Neschtwärme. Meischt lääst noch die Frau Meier aus der Buchhaldung e Geschicht vor, je noo Geschäftslaache e besinnlichi odder e sozialkritischi. Midd dem Gliehwein muss mer doo allerdings uffpasse. Nidd dasses emm so geht wie meinem Freind Schorsch, wo als Niggelaus sei grooser Ufftridd gehadd hadd. Unn midd anzüglichem Unnerton sei Chef gefrood hadd: Warscht du aach schön brav? Was ihm zwar e Heiterkeitserfolsch bescheert hadd, awwer aach e beeser Karriereknigg.