Mir hann joo hie in Dengmerd sogar es gleichmamische Landesinstitut, wo sich doodrum kümmert. Prävenzioon das iss, wammer vorsorglich die Aue uffhalt unn midd e paar Triggs dem Treiwe vunn denne Spitzbuuwe e Richel vorschiebt. Weil Vorsicht bekanntlich die Mudder der Porzelaankischd iss, kann e gesundes Maß an Misstraue uff jede Fall ganz niddslich sinn. Wann ich gar kään Enkel hann, doo iss e entsprechender Aanruf joo eejer midd Vorsicht se geniese.Wos aach noch um die Vorsorsche geht, das iss bei der Gesundhääd. Doo nennt mer das allerdings Profühlaxe. Im Grund gehts doo aach um die Stärkung vunn de Abwehrkräfte. Unn wann sich dann doch e Wehweche ingeschlich hadd, doo probiert mers seerscht mool midd Hausmiddelele, wo de Oma noch all gekennt hadd: Die gudd alt Wärmflasch, Inhaliere mit ästhetische Öle odder Kräudertees midd so blumische Noome. Nur die Kinner siehn das meischt nidd in und sinn genervt, wann die Mamme dauernd saad: Zieh dei Kapp aan, wanns räänt unn mach dei Jack zu, dassde dich nidd verkälschd.Mer kanns awwer midd de Vorsichtmaasnahme aach iwwertreiwe. Wann bei meinem Freind Schorsch es Tante Luwwies uff Besuch kummt, doo muss sei Klääner vorher immer geberscht und getrählt werre. Awwer wie das im Lääwe manchmool so kummt, isse dann doch nidd kumm. Doo hadd der sich beschwert: Sieschde, jedds stehn ich doo midd meim gewäschde Hals.