Wo iss bloos die Zeit hin

Diebe kumme joo meischt naachts, wann de nichtsahnende Bürger sei Scheenhäädsschloof absolviert. So wie jeed Johr ware se jedds aach widder unnerwääs unn hann uns schunn nochmool e Stunn geklaut. Ausgerechend uff de Ooschdersunndaach, wo mer eichendlich Eijer im Neschd erwaarde kann unn nidd so e Klopps. Wo doch in unsrer Zeit die Zeit sowieso schunn zu de knappschde Güüder geheert

Diebe kumme joo meischt naachts, wann de nichtsahnende Bürger sei Scheenhäädsschloof absolviert. So wie jeed Johr ware se jedds aach widder unnerwääs unn hann uns schunn nochmool e Stunn geklaut. Ausgerechend uff de Ooschdersunndaach, wo mer eichendlich Eijer im Neschd erwaarde kann unn nidd so e Klopps. Wo doch in unsrer Zeit die Zeit sowieso schunn zu de knappschde Güüder geheert. Sie hanns allerdings nidd heimlich gemacht, sondern hanns vorher sogar noch groos unn breit aangekinnischd. An de tiefere Grund fier die Zwangsmassnahme kammer sich awwer heit nur noch dunkel erinnere. Es soll sellemools in de siebzischer Johre irjendwie ebbes midd der Energiebilanz se duun gehadd hann. Unn die hadd sich joo bekanntlich durch so Massnahme seitdemm wesentlich verbessert. Oh geh mer doch fort! Doo kammer nur saan: Uhrevergleich - beim Gongschlaach schlaads dreizehn!Vunn weeje Energie spare. Wo mer sowieso schunn morjens so schwäär ausem Bedd kummt. Es hääscht joo nidd umsunscht: Morjestunn hadd kurze Bään. Was menne sie, was mer fier e Energie spare kinnd, wammer äänfach länger leije bleiwe derft. Imme Dengmerder Meewelgeschäfft hann ich jedds e Aushang gelääs, dasse doo Testschläfer suche. Das hann ich gleich meinem Freind Schorsch verzählt, wo aach so e ganz ausgeschloofener Tüüp iss. Awwer du brauchschd das joo nimmeh se teste, hann ich noch im Spaß gesaad, du kannschd das joo schunn. Awwer wanns in unsere heggdische Zeide mool werklich aarisch pressiere sollt unn mer nidd wääs, wo mer die Zeit hernemme soll, doo halt mers am beschde midd dem Spruch vum alde Moltke: De Daach hadd 24 Stunne, wann ihne das nidd reicht dann nemme se noch die Naacht dezu.