Unn de geneichde Inderessend, wo doo iwwerall debei sinn will, der muss iwwer e guddi Kondizioon verfüche. Unn e solides Süsteem hann, fier das alles unner ääner Hudd se bringe. Wo mir joo all de ganze Daach sowieso noch sovill anneres um die Ohre hann. Am beschde schreibt mer sich alles uff, dassmers nidd vergesst. Tradizionell unn altmodisch in de Terminkalenner. Odder noch besser in so e subber-praggdisches Programm in seim Händi. Bleed iss dann nur, wammer ausgerechend das gudde Stigg vor lauder lauder irjendwo leije losst. Neilich hann ich gelääs, dass in de Londoner Taxis jeed Johr sache unn schreiwe hunnertneinzisch Dausend Handys vergess werre. Heid saad mer allerdings nimmeh: das hann ich vergess. Mer saad jedds: das hann ich verpeilt. Awwer de Effekt iss deselwe. Odder mer saad, mer hädds verleed. Was awwer kää Beitraach zur derzeidisch Buchmess iss.

Aach ebbes vergess hadd neilich e Mensch im Ruhrgebiet , nämlich fier sei Rechnung se bezahle. Unn desweeje hannse ne noo mehrfache Mahnunge zu e Paar Daach Gefängnis verdonnert. Die Polizei , wo gewisst hadd, dasser sich effder in Spielhalle rumtriebt, haddne dort uffgespiert. Sie hadd ne awwer widder misse laafe losse. In dem Moment nämlich, wo se ne verhaffde wollde, hadd sei Audomaad Dausend Euro ausgespuggt unn er hadd kinne sei Schulde bezahle. Dass der so e unverschämder Dusel gehadd hadd, das werrd der sicher so schnell nidd vergesse.