De Mensch iss joo e Gewohnhäädstier. Desweeje isses gudd, dasses jeed Johr ausgerechent um die Zeit widder Herbscht werrd. Doo holt mer sich zwar meischt nasse Fies unn die Nas laafd. Awwer es hadd doch denne Vordääl, dassmer die Prozeeduur schunn vun de friejere Johre her kennt. Doo hadd sich dann schunn e gewisses Vetrauensverhältnis zu de Johreszeide uffgebaut.Annere Sache degeeje, die ännere sich so schnell unn heffdisch, dass mer Probleme hadd, fier midd dem Tempo middsehalle. Die Müsteerije rund um die Betriebsabläuf vunn der Bahn sinn so e Beispiel. Jetzt hannse in Dengmerd sogar e VHS-Kurs inngericht fier uns reifere Johrgäng. Die wo in ihrem juchendliche Leichtsinn menne, es gäb doo noch Schaltere, wo mer e Fahrkart bekäm. In dem Schnellkurs werrd mer doo jedds so geschult, dass mer sich maschinegerecht verhalle duud. Unn mer nidd am Enn betribbst uffem Bahnhof steht, wann de Zuuch der Zeit längschd abgefahr iss.

Doo helft awwer kää Jammere, es iss eewe alles nimmeh so wie friejer. Unn noch nidd mool uff die tiefsinnische Weishääde vunn dämliche alde Witze kammer sich verlosse. Vielleicht hann sies aach gelääs: neilich hadd beim Wettbewerb im Riggwärts-Innparke e Blondine gewunn. Das muss mer sich mool uff der Zung zergehn losse: e Blondine. Ei doo brecht mir doch mei scheen möblierdes Weltbild sesamme. Unn wie ich gemennt hann, es kind nidd noch schlimmer kumme, doo lääs ich, dasse die Gene vumme Schimpans als Patent aangemeld hann. Vielleicht sollt mer joo die wo das geneemischt hann mool uff e Gen-Defeggd unnersuche. Simmer mool ehrlich, doo wääs mer doch nidd, ob mer iwwer so patentierter Schwachsinn lache odder heile soll.