Weihnachde widder dehemm

St. Ingbert · Mer hanns joo ball widder geschafft, heert mer jedds als schunn mool jemand stehne. Die Zeit unmiddelbar vor Weihnachde iss nämlich meischd e ganz scheener Stress. Unn das nidd blos fier die Fachkraft im Einzelhannel odder die weibliche Hilfstrubbe vum Chrischdkindche dehemm.

Dass iss iwwerhaupt es Stichwort: Richdisch Weihnachde feiere, das geht nur dehemm, in der familiäre Neschdwärme. Wann an Heilisch Oowend die ganz Heggdigg mool vunn emm abfallt. Mer schwäddsd joo nidd umsunschd scherzhaft vunn Gefiehle wie Weihnachde.

Unn es schaad dann aach nix, wammer zwischedurch mool an all die denkt, die wo die Feierdaache auswärts verbringe misse. Odder vielleicht gar kää Dehemm meh hann. Wo mirs uns zur selb Zeit in der gudd Stubb gemiedlich mache. Vun der Mamme gebbds selbschd Gebaggenes unn vumm Babbe ausnahmsweis mool selbschd Gesungenes. Das ääne iss geschmaggvoll unn das annere eejer Geschmaggsach. An Weihnachde iss es wie midd de Pläddsjer unn em Fernsehprogramm: es kann ruuisch e kräffdischer Zuggerguss owwedruff sinn. Wammer an Weihnachde nimmeh gefiehlvoll unn sentimental sinn derf, ei wann dann sunscht! Das leit wahrscheins doodraan, dass mer sich bei dem Aanlass an die eichene Kinnerzeit erinnert.

Es sogenennde innere Kind in uns all, das wo es ganze Johr uff Tauchstation war, kummt jedds widder bei Kerzeschein zum Vorschein unn macht ganz groose Aue. Sowieso unn iwwerhaupt duud mer das ganze stimmungsvolle Drummerumm an de Weihnachde nur veranschdalde weeje de Kinner. Mir Erwachsene sinn joo eichendlich uffgeklärrde Mensche unn iwwer das Alder schunn lang enaus. Und weeje de Geschenke? Ach du liewer Himmel - im Grund hammir doch schunn alles.

Meistgelesen
Neueste Artikel
Zum Thema
Aus dem Ressort