Odder in de einschlächische Quiz-Sendunge, wo mer so kloore Sache gefrood werrd wie: Wieviel Gehirne hadd e Tindefisch odder wie wehre sich Eichherncher geeje Klabberschlange? Unn seltene Mineralije unn edle Stään kammer sich joo am Wocheenn in der Stadthall aangugge unn debei ins Staune kumme.Wertvolle Stään werre awwer aach als im unn ums Haus verschafft, in Form vunn Pladde in der Innfahrt zum Beispiel. Unn doo kummt dann die Vegetation in Spiel, indem dass die doo Probleme macht. Die Bääm weerfe nämlich awweile ihr Blädder ab, ohne Riggsicht uff denne scheene Belaach aus Spritzbedong. Unn auserdemm sinn die joo aach noch gefährlich, weil se die Fahrbahn so gliddschisch mache.Fier annere Pflanze, also die wo mer freiwillisch uff der Veranda halt, hadd jedds die Stadtgärtnerei aangebodd, dasse die, wanns denne drause kalt werrd, bei sich iwwerwindere losst. Geeje e klääner Obulus. Gar kää schlechdi Idee. Wanns heid sogar schunn Hundepangsione gebbd, warum dann nidd aach Blume-Sitter. Doo sinn se dann gudd unner, wie mer so scheen saad.Vunn der Vegetation isses dann garnidd weit bis zum Vegetarier . Das sinn die Leid, wo sich an de Hase ihrem Fudder vergreife. Mei Freind Schorsch, dem wo mer sei langjährischi Vorliebe fier Schlachtpladde ansieht, hadd jedds behaupt, er wär im Grund aach Vegetarier , unn sogar hoch zwei: bei ihm käm nur noch Fleisch vunn Viescher uff de Deller, die wo sich selwer vunn Pflanze ernähre.