Wann am Wocheenn die Tuurismusbörse in Dengmerd iwwer die Biehn geht, doo stehn einische schunn in de Startlecher unn denke: nix wie hinn. Das klingt nämlich immer so scheen noo Freizeit, Tabeedewechsel unn Reiseluscht. Unn doo iss dann de erschde Gedanke: nix wie jeh! Uff jede Fall iss das schunn mool e Vorgeschmagg uff de Summer unn de Urlaub, aach wanns nur seerscht mool die Urlaubsplanung iss. Es scheenschde am Urlaub iss joo sowieso die Planung. Weil de Urlaub selbscht ganz oft in natura nidd halb so scheen iss, wie mer ne vorher geplant hadd. Unn wie er im Prospeggd steht. Es iss sowieso kloor, dass die Leid, wo es ganze Johr iwwer am liebschde ihr Gereescheldes hann, uff äämool im Urlaub gääre immer ebbes Neijes erlääwe. Wahrscheins graad als Ausgleich fier de Alltaachstrodd sinn dann die Iwwerraschunge die Würze im Lääwe, vorzuchsweis nadierlich die angenehme.Friejer haddmer das in der Reisebranche e Fahrt ins Blaue genennt, weil mer vorher nidd genau gewisst hadd wos eichendlich hingeht. Jedenfalls steggd in dem Begriff Tuurismus es Wort Tuur drinn. Unn es muss joo noch nidd emool e groosi sinn. Weil unser heimischi Geeschend hie joo tuurisdisch immer meh uffgemeewelt werrd. Dass mer sich langsam frood, warum mer iwwerhaupt noch woannerschd hinfahre muss, wos doch hie erumm so scheen iss.

Unn bei der Geleeschendhääd kumme dann aach die einheimische Produggde zu Ehre, wie mer bei dem Biosphäremarkt hautnah beschnubbere kann. Die sinn deshalb so beliebt, weil joo unser Nahrungsmiddel meischdens aach tuurisdisch durch halb Europa unnerwää ware, bevor se uff unsere Tellere lande. Unn mer zum Schniddsel saan kann: Ei wo kummschd du dann jedds uff äämool her?