Mundart-Kolumne E rustikaali Tuur
Aus der leddschd Finanzkrise kenne se sicher noch die „Bad Bank“, was uff Deitsch hääscht: e schlechdi Bank. E besserer Vorschlaach in Form vunn rer gudd Bank hann jedds die Ortsrät vunn Owwer- unn Niederwerzbach gemacht. So e niddsliches Stigg Meewel wolle se nämlich dort jeweils uffstelle, fier die Mobilitääd iwwer die Stadtgrenze enaus se ferdere.Unn das geht dann so vor sich, dass jeder, wo e Mitfahrgeleeschenhääd in de Nachbarort braucht, sich doo druff hugge kann. Das iss soosesaan e senioore-freindlichi Version vomm gudde alde Trämpe, wo friejer bei de Junge schwäär in Mode war. So kommt alles irjendwann mool widder. Die Bolidigger saan joo aach als, sie wollde die Birjer middnemme. Was sich immerhin besser aanheert wie wanns hääscht, sie wollde se abholle. E scheener Nääwe–Effeggd iss aach, dass mer dann ganz elegant ins Gespräch kommt.
Wammer jedds im Urlaub in die Berje fahrt, doo kummt mer uff seiner Wanderung garandierd an irjendrer Alm vorbei. Unn es scheenschde an soorer Alm – nääwe der Sennerin – iss joo e zinfdischi Hidd. Schunn weeje dem sprichwertliche Hidde-Zauber.
Awwer mir in Dengmerd hann joo aach jeedi Meng zauberhaffde Hidde. Wo se sogar tuurisdisch demidd Reklame mache. Im Indernedd werrd die Hidde-Tuur midd dem Abbedidd aanrechende Titel aangepries: „Kein Platz für Kalorienzähler.“ Weil so e Wannerung quer durch unser Natur-Attrakzioone nadierlich ordentlich Kohldamp macht.
Apropos Dampf: friejer sinn die Leid hie bei uns, wann se uff die Hidd gestiwwelt sinn, dorthin uff die Arwedd gang. Nämlich uff die Eise-Hidd. So wie mer joo aach nidd in der Grub, sondern uff der Grub geschafft hadd. Obwohl de Arwedds-Pladds ziemlich unnerhalb vunn der Owwerfläch gelää hadd.
Awwer heid duud mer schunn lang nimmeh infahre, do duud mer liewer inkehre. Raum iss bekantlich in der kläänschd Hidd. Unn wann der mool e bissje knapp werre solld, doo riggd mer äänfach e bissje enger sesamme. Das iss sowieso gemiedlicher unn mer kummt sich menschlich nääjer. Wammer sich nämlich die ganz Woch iwwer midd annere Leid ausenanner geseddsd hadd, kammer sich doo mool midd denne sesamme siddse.
Manchmool gehts dort awwer aach hoch her. Dann brennt die Hidd, wie mer so plassdisch saad. Wie zum Beispiel beim Kahleberschfeschd am kommende Wocheenn in Rohrbach. Das wo unner dem scheene Moddo steht: De Bersch ruft. Und das gewaldisch. Mei Freind Schorsch, wo e bissje lahm se Fuus iss, hadd nur gemennd: Ich ruf spääder serigg. Debei werrder joo sogar middem Fahrdienschd ruff gefahr. Doo bräuchder noch nidd mool selwer se laafe.
