Mundart-Kolumne Schaddssuche uffem Speicher
Am Samschdaach kinne all Fääns vunn aldem Kram unn Nibbes in Dengmerd widder so richdisch in die Volle greife. Beim Floh- unn Trödelmarkt an der alt Schmelz. Doo kammer nämlich fier e Abbel unn e Ei alles Meeschliche unn Unmeeschliche midd hemm schlääfe. Es äänzische wasses nidd gebbd sinn Fleeh, awwer uff die kammer notfalls verzichde. Trödelmarkt hääschd das Iewent desweeje, weil mer sich vill Zeit losse muss, fier die erhoffde Schäbbcher unn Sahnstiggcher in dem Schlaraffeland uffsespiere.
Wo nämlich der ään nur Gelumbs unn Schamass sieht, wo eichendlich uff de Sperrmill geheert, kried e annerer ganz glänzende Aue. Doo hann sich dann im Idealfall zwää gesucht un gefunn. Unn so e Geschäffdsabschluss nennt mer glaab ich e Winn-Winn-Sidduazioon. Aggduell werrd joo aach graad im Fernsehn es halwe Programm midd so Sendunge beschdridd. Unn doo duun se dann die Zuschauer aach noch uffstiwwele unn denne e Floh ins Ohr seddse.
Vunn weeje sie sollde mool uffem Speicher odder im Keller noogugge, ob se nidd noch irjendwoo so e aldes Erbstigg uffstöbere. So e antiekes Werdigoo vum Tante Elsbeth vunn anno Tuwwagg, wo die Holzwermer noch middelhochdeitsch kenne. Odder vielleicht e öölisches oder wässrisches Gemälde vunn me verkannde Kinschdler. Awwer meischd iss leider das, was mer finnd, dann doch nur Krembel unn kää Kunschd ausem Hochpreis-Segmend.
Was uff soome Markt aach gääre gehanneld werrd sinn äldere Miggimaus-Heffdcher unn Regalmeeder an schweinsledderne Biecher. Dass die aus zwädder Hand sinn, das merkt mer manchmool doodraan, dass doo als mool noch e vergilbder Liebesbrief in Sütterlin-Schrift drinsteggd. Odder awwer herzliche Urlaubsgriess aus Rimini vunn 1957.
