Es lääbt sich äänfach besser uff der Sunneseid vumm Lääwe. Awwer doo beweist sich aach mool widder die ald Weishääd, dass es nix schlimmeres gebbd wie vunn ebbes sevill. Mer muss dann nämlich glei widder an de Sunnenschudds denke. Fier die emfindlich Haut unn fier die Aue. Unn doodefier gebbds die Sunnebrille. Im Geejesatz zu der rosarot Brill, midd der wo mer sunschd dorchs Lääwe laafd, iss die Brill awwer schwarz geteent. Unn bei manche nidd bloos wann die Sunn scheint. Mer sieht dann nämlich nix meh vun de Aue, was besunnerschd ginschdisch iss, wammer e langi Naacht hinner sich hadd. Besunnersch die Prominennde, die Reiche unn die Scheene duun diesbezieglich midd besunnerschd ausgefallene Exemplare strunze. Unn je noondemm was so jemand fier e Sunnebrill uff der Nas hadd, kammer angeblich erkenne was das fier e Tüüp oder e Tüüpistin iss. Unn sogar die Gängschdere in de Filme finne so ebbes kool. So e Nasefahrrad iss eewe ganz ebbes anneres wie e Kassebrill.

Was joo bei uns aach fier unheimlich kool gilt, das iss das Pseudo-Englisch aus der Reklame. Wo e Firma aus der Geeschend hie mir e Inladung geschiggd hadd fier de Daach der offene Dier. Unn iwwer dem Datum hadd digg gestann: Save the date. Weil sich bei mir joo bei so Ausdrigg die Zeewenääschel kringele, hann ich mei Freind Schorsch gefrood, was das hääsche soll. Ei das werrd ausgesproch: Sääf se Dääd: Unn weil das e Firma fier Kosmeedigg wär, werde die das schreiwe, weil se aach Sääf verkaafe dääde.