Schreib mer doch mool e Kaard!

Saan Sie mool, schigge Sie eichendlich noch Kaarde ausem Urlaub? Also so richdische midd malerische Motive vunn der Alm odder vunn monumentaale Denkmoole. Weil, heidsedaach knippse die Leid joo die Bilder all middem Händi selwer. Unn die sinn dann so fix middrer Ie-Mail verschiggt, so schnell kammer garnidd schreiwe: Mir sinn graad im Urlaub aankumm unn de Klään hadd Durchfall

Saan Sie mool, schigge Sie eichendlich noch Kaarde ausem Urlaub? Also so richdische midd malerische Motive vunn der Alm odder vunn monumentaale Denkmoole. Weil, heidsedaach knippse die Leid joo die Bilder all middem Händi selwer. Unn die sinn dann so fix middrer Ie-Mail verschiggt, so schnell kammer garnidd schreiwe: Mir sinn graad im Urlaub aankumm unn de Klään hadd Durchfall.Bis mer so Kaarde an die ganz Verwandschaft geschrieb hadd, doo iss ball e ganzer Daach vum Urlaub rum. Wann die Sunn scheint, doo hadd mer kää richdisch Luschd, unn wanns an den schenste Daach im Johr räänt, ei wer will dann so ebbes schreiwe. Dass die Verwannschaft heimlich feixt: wärener dehemm geblieb.

Neiderdings gebbds awwer aach immer meh so Poschdkaarde midd ulkische Bilder unn meh odder weenischer sinnische Sprich druff: Sei du selwer, annere gebbds schunn genuch! Odder fier die wo sich fier Grammadigg interessiere: Genitiv ins Wasser, weils Dativ iss! Iwwrischens haddmer joo in Dengmerd die groos Auswahl, wammer Kaarde noch ganz altmodisch poschtalisch verschigge will. Grad neilich hannse e ganzer neier Satz midd de scheenschde Dengmerder Motive erausgebrung. Unn die Nostalgiker kinne midd historische Kaarde im Stadtarchiv ihr Erinnerunge ufffrische. Unn nidd se vergesse die Kunschdposchdkaarde vum Weisgerber, wo mer sei Bilder en miniatüür bewunnere kann. Aach wanns Museum in Dengmert schunn lang nimmeh uff iss. Wo schunn vum Weisgerber die Redd iss: beim Wassermann-Verlaach gebbds sogar e Noodrugg vunn rer Poschkaard ausem Johr 1906. Die Josefskerch iss druff unn die alt Brauerei unn owwedriwwer steht: Gruß aus St. Ingbert. Unn de Weisgerber hadd die eichenhännisch unnerschrieb. In der sogenennde gudd alt Zeit. Als Kaarde se schreiwe noch nomal war.