Mundart-Komlumne Riggbligg uffs Erbe

Die Experde sinn sich nidd sicher, ob mir hie e roosischi Zukunft hann. Awwer dass Dengmerd e ruusischi Vergangenhääd gehadd hadd, dass iss e hisdoorischi Tatsach. Unn dass das nidd vergess werrd, gebbd in de näägschde Daache e grooses Programm gebodd iwwer de eejemalische Berschbau.

Mundart-Komlumne: Riggbligg uffs Erbe
Foto: SZ/Robby Lorenz

Sinnvollerweis unner der Fedderfiehrung vumm Stadtarchiv, wo joo aach im Sutterräng zugang iss.
Es sinn genau 60 Johr her, dass die leddschd Gruub in Dengmerd zugemacht hadd. So e Veraanschdaldung iss wichdisch insofern, als dass aach noch spätere Generazioone sich e ungefähres Bild vunn unsrer Geschicht mache kinne. Unn dass die nidd womeeschlich menne, die Kohlestroos hääscht so, weil dort mool es Finanzamt gestann hadd. Unn se aach noch wisse, warum mir hie e Berschkabell hann. Odder was e Mudderkleddsje iss. De Abbau vunn dem schwarze Gold hadd näämlich aach in unserer Sprooch sei Spure hinnerloss. Vumme Freind saad mer zum Beispiel, es wär e gudder Kumbel. Unn wann ich mir hie so mei tiefschürfende Gedanke iwwer das Thema mache, doo hadd der Ausdrugg irjendwie aach doodemidd se duun. Wanns allerdings im „Jedermann“ hääscht: „Fährst in die Grube nackt und bloß, so wie du kamst aus Mutters Schoß“, doo bezieht sich das nidd unbeding uff de Berschbau. Obwohl das joo sollemools e knocheharder unn gefährlicher Dschobb war. Aach wanner heit – seit Schicht im Schacht iss – gääre e bissje verklärt werrd. Im wehmiedische Rückbligg uff e Zeit, wo aus me eejer ländlich–idyllisches Fleggche e buumendi Industrie-Reeschioon worr is. Unn mer iwwertreibt bestimmt nidd, wammer saad: Wie hie middem Berschbau Schluss war, doo iss in unsere Breide e ganze Epoch zu Enn gang.

Meistgelesen
Neueste Artikel
Zum Thema
Aus dem Ressort