Vor allem in der Innestadt, wo es Stadtlääwe pulsiere soll. Doodefier hammir dann die Fußgängerzone. Allerdings iss das Attribut Zone werbetechnisch nidd de ganz große Knaller. Unn es spielt sich heid eewe vill an der Pärifeerie, uff der sogenennde grien Wies ab. De neije Fernseejer unn Kombjuuder denne gebbds doo im Sonderangebodd als Schnäbbche. Wanner dann kabudd iss, sucht mer verzweifelt e Fachgeschäft wo ne rebbariere duud.Unn dann kaafe die Leid aach noch wie wild im Indernedd. Das duud weenischdens der Poscht noch Uffträäch beschere. Was aach uffallt iss, dass sich die Grenze in de Sordimender immer meh verwische. In der Bäggerei krieschde Worschd unn Käs, doodefier gebbds beim Metzjer Breedcher unn notfalls aach e Zeidung. Im Kaffeegeschäft kammer im Friejohr Heggeschere unn im Winder Schi-Ausrüschdunge käuflich erwerbe. Unn die Bezeichnung Tankstell nemme nidd bloos die Junge schunn seit längerer Zeit ganz wertlich. Unn degge sich doo midd Spirituose, Schnääges unn Imbiss inn.

Es wunnert emm aach garnimmeh, dass e ziemlich grooser deitscher Audo-Hersteller nääwehäär noch Körri-Werschdscher produziere duud. Unn zwar in so raue Menge, dasse jedds doodevunn meh verkaaf hann wie vunn ihre Audos. Nmlich so zirka an die 8 Millijoone. Unn de Senf zu denne Werdscher kammer dann in der Buchhandlung kaafe. Weil die sich dort midd Recht saan: Ei wann das so iss, - was ihr kinne kinne mir schunn lang.