Derzeit sinn joo in der Stadthall widder die Kabaretischde in Akzioon, wos Zeitgeschehe unn die doodrinn verwiggelde Aktööre durch de Kakao zieje. Odder noch treffender gesaad in die Dengmerder Pann haue. Unn aach wann die Lage widder emool noch nie so ernscht war, werrd die Zeitkritigg em Publikum gääre in satirisch-humorisdischer Form verabreicht. Fascht wie friejer bei de Hofnarre. Annerschd duud mer die Leid ball garnimmeh erreiche, als dass mer ihne die biddere Wohrhääde in luschdischer Verpaggung schmagghaft macht.Weil mir joo runderum laufend midd sovill Jux unnd Halligalli verwehnt werre, dassmer menne kinnd, es Lääwe wär e äänzischer Vergnieschungspark midd ingebauder Erlebnisgastronomie unn Fun-Faktor. Desweeje winsche se uns im Fernsehen aach vor jeder Sendung: Viel Vergnügen! Es gebbd nadierlich Leid, wo das ständische Gedöns uff de Wegger geht. Die wo saan: Ei reichts nidd, dass ich de ganze Daach schwäär schaffe muss, muss ich mich oowends aach noch krampfhaft amisiere. Awwer so jemand werrd dann direggd als Spielverderwer verschull unn als Spaßbrems. Awwer es Lääwe iss nu mool nidd eewisch e Zuggerschlegge. Desweeje heischt joo aach der Stoff, denne wo mir so dringend zum Lääwe brauche Sauerstoff unn nidd Siesstoff. Ganz friejer hann die Leid das aach noch aus Erfahrung gewisst. Das ware die Zeide wo nur halb so luschdisch ware, unn mer fiers Vergniesche noch Steiere hadd misse bezahle. Doo iss mer dann äänfach zum Lache in de Keller gang. Was awwer dann schunn e Art Steierflucht war. Wie mer sieht stoost mer iwwerall bei der Spaßmacherei an die ernschtere Theme. Wobei emm dann manchmool bekanntlich es Lache im Hals stegge bleibt.