Mundart-Kolumne Nix wie ab ins Griene
Aach wann die vill zitierde laue Lüffde noch nidd so richdisch erwacht sinn, iss doch schunn mool es Wort März ein Hinweis, dass de Kalenner uffem richdische Wää iss. De März iss joo bekanndlich de Monaad, wo de Bauer gääre die Rösser aanspannd.
Wobei eejer die Päärde-Stärke unner der Moodorhaub zum Insadds kumme. Wanns die Leid jedds langsam widder noo drause ins Griene zieht. Die Farb iss joo erwiesenermaase gudd fiers Gemied unn schmeichelt aach de Aue. E äänzische wo mer se nidd so gääre sidd, iss hinner de Ohre.
Awwer apropos Au: Wammer sich awweile per pedes in die Nadduur uffmacht, muss mer manchmool nidd selde midd Hinnernisse rechne. Wie zum Beispiel doo wo „In der Au“ die Brigg iwwer die Bahn geht. Das hääscht, sie geht gradd nidd iwwer die Bahn, weil mer das Briggelche nämlich nimmeh benuddse derf. Awwer bis zum Summer wäre se midd de Reberadduur ferdisch, hadds gehiesch. Wie saad in soome Fall de Volksmund: Grien iss die Hoffnung.
An rer anner Stell in Dengmerd soll awwer doodefier ball e ganz neiji Grien-Oase angeleed werre. Nämlich an Thume Egg, wos zur Zeit obbdisch noch e bissje kahl aussieht. Wanns dann am Enn aach nur e klääner bunder Tupfer anrer Stroosekreizung werrd, mer sieht uff jeede Fall de gudde Wille.
Doodebei gebbds joo hie midde in der Stadt e greeseri idüllischi Grienanlaach, es scheenschde Fleggsche Nadduur, wo graad ums Egg leid. Wammer sich die bröggelisch Tischtennishall mool wegdenkt. Awwer vor korzem iss die Meldung kumm, dass ausgerechend es Parkfeschd hädd dies Johr ausfalle solle. Awwer se hann sich jedds doch noch mool sesamme gehuggd – am griene Disch – unn hanns geschafft, das Feschd im Griene doch noch mool hinzukrien.
